軒仔放棄整容有鼻無患
被暱稱為「皇上」的張敬軒前晚開騷時罕有露龍體，自稱踏上「脫星之路」，更被粉絲封為「小鮮肉」！軒仔又自嘲為了前途着想早就應該郁吓個樣，又自爆曾獲高人指點，稱其鼻子有利聚財，即「夾萬鼻」，並笑言男人最緊要個鼻！
歌手張敬軒前晚於旺角麥花臣場館舉行《KKBOX LIVE：張敬軒ONE DAY音樂會》，圈中好友鍾舒漫、鍾舒祺、王宗堯等現身撐場，自言過去在台上形象較斯文的軒仔笑說以後要「做番自己」，即場歌星變「脫星」多次脫衣露出大肉背之餘，更在encore時不顧形象熱唱《你阿媽大減價》，唱畢後High爆的軒仔講笑話：「多謝大家一齊見證一個歌手事業結束，我終於放低偶像包袱！」
恨做「小鮮肉」
成功將「偶像包袱」拋諸腦後的軒仔在開騷期間亦爆事連連，除舞衣忘拆防盜器外，又為粉絲高呼的「小鮮肉」稱號沾沾自喜，再自爆曾想過要「郁」吓個樣：「你嗌我『小鮮肉』我真係好開心，我呢啲三十幾年嘅，唔係紅酒喎，係臘肉嚟，有時會覺得錯過咗包裝嘅時間，嗰時真係應該整整（容）佢。」
而軒仔唱畢容祖兒的《女皇》後，軒仔又將綵排時來探班的祖兒擺上枱，笑稱對方應轉行破地獄：「你哋有冇啲朋友係高分貝到可以將你浪漫、悲傷所有都打碎？我成日都話祖兒唔去做破地獄係嘥晒。」
擺祖兒上枱
不過，軒仔後來受訪時就表示沒勇氣在面上動刀：「有勇氣就整咗啦，以前我媽成日話我蒜頭鼻，後來有高人話我個鼻聚財，即係夾萬鼻，男人最緊要個鼻。」軒仔又談到今次的音樂會有很多舊歌都沒機會唱，原因是近年的版稅加了不少。
事後，記者致電祖兒提到軒仔開騷笑她應轉行做「破地獄」，祖兒笑說：「咁梗係唔介意啦，同皇上（軒仔）咁熟，如果唔係friend點會揀我啲歌嚟唱吖。」
另外，早前涉嫌酒後駕駛被捕的音樂人Johnny Yim（嚴勵行）當晚亦有份參與音樂會，謝幕時軒仔更開玩笑叫對方在慶功宴「飲少啲」，不過完騷後Johnny Yim拒絕受訪。文：音樂組