連詩雅冒跛備戰挪威半馬
歌手連詩雅（Shiga）為即將出戰挪威的大型半馬馬拉松賽事，進行密集式體能特訓，首次挑戰半馬的Shiga大爆是次負腳傷出戰，更懶理醫生勸告暫時停跑，靠食止痛消炎藥「撐住」繼續訓練，還無懼跛的風險：「即使驚影響日後做運動，都唔會放棄賽事。」跑出香港勢在必行！
連詩雅（Shiga）即將出戰周六（19日）舉行的北歐挪威大型半馬馬拉松賽，連月來與盛傳被硬撬過檔的前鄧麗欣排球隊Loey「球花」梁諾妍（Inez）進行密集式體能特訓，誓要跑出香港！日前她倆結伴到拳館打泰拳操心肺功能，又做瑜伽動作訓練柔軟度，當Shiga由專業人員以「狼牙棒」治療她多年來因跑步弄致的傷患時，不禁痛苦尖叫。
食藥頂住一痛就停
Shiga坦言因以往跑姿不正確，以腳（月爭）先落地導致膝蓋長年勞損，但她對首次參與半馬賽事及跑出香港，感到緊張又開心，使命感大增。因膝蓋傷患，Shiga曾去睇骨科及照X光：「醫生話我成個膝頭哥腫脹，關節筋膜炎、肌肉發炎，要食消炎藥。依家跑步對我嚟講係吃力，唔可以太過overuse膝頭，醫生都有勸我休息多啲，但我好想完成半馬賽事，惟有一痛就停。」她承認痛到要食止痛藥：「都怕影響之後做運動或行路，但我就算冒住跛嘅風險，跑完先算啦，心理上嘅興奮掩蓋晒所有傷痛，唔會放棄！」
Inez目標跑兩個半鐘
至於Inez是否因備戰賽事退出Loey排球隊？Inez說：「我哋每星期最少跑三、四晚，實在冇時間再練排球，之後有時間嘅話，都會打番排球。」又說她倆對賽事設有時間目標，希望可在兩個半小時內跑畢全程！另方面，Shiga前晚與師兄周柏豪出席音樂會，訪問期間，身穿短裙的Shiga疑因動作大，不慎走光露出黑色打底褲。
文：名人組