張繼聰自嘲樣衰靠口技加分
藝員張繼聰、林夏薇及楊明等昨日出席新劇《收規華》宣傳，眾人更與長者提早迎中秋，席間阿聰表演口技扮拉二胡聲，引得眾人笑聲連連，事後自嘲樣貌差，惟有以另類技能搭夠。
謝安琪晚晚捧場
問到太太謝安琪及囝囝可有捧其新劇場？他謂：「有，個仔開始識唱首主題曲，好大進步，佢好少唱我啲歌，太太每晚趕返屋企睇，又會send whatsapp片段話邊場感動，有網友話套劇係佢哋心目中『最佳劇集』 ，我都好開心！」那有否信心入圍角逐視帝？張繼聰笑謂：「諗起都腳軟，平常心，我喺拍劇都係新人，之後啲台慶劇都係頂級前輩，到時可以坐隔籬，偷偷地selfie已經滿足，純粹停留青少年心態，求集郵。」
林夏薇逼老公煲劇
林夏薇則透露有逼老公於半夜重溫新劇，沒料到令對方抑鬱，她謂：「因為我個角色慘，佢支持我有睇到，但睇完瞓唔着。前兩集好少少，點知尋晚又慘過，先生就忍唔住話『又嚟』！」談到該劇被網民捧為年尾「最佳劇集」，薇薇表現興奮說：「真係？太開心，其實拍呢套劇學到嘢，拍嗰時我仲專登去石塘咀了解歷史添！」至於楊明就表示忙於拍攝新劇《巨輪2》，又要為另外兩部劇《張保仔》及《梟雄》宣傳，可謂分身不暇。
文：影視組