祖兒香閨舞龍100次
樂壇天后容祖兒與李克勤預告在演唱會上大跳辣身舞，雖然兩位大忙人經常無暇練舞，但克勤踢爆祖兒臥虎藏「龍」，找來男友劉浩龍做秘密「舞」器，在香閨火辣辣共舞，被爆料的祖兒即向克勤詐型：「搞錯！咁冇雷！」
祖兒與克勤聯手舉行的12場「容祖兒李克勤演唱會」於本周五開鑼，前晚兩位主角進行大型舞蹈綵排，兼且齊晒「老鼠仔」展示操弗成果。不敢鬆懈的祖兒仍在節食瘦身，相反克勤健身三星期後已順利達標，令祖兒大叫羨慕：「好叻，好羨慕，我見過蔡卓妍開騷前都可以狂食，克勤就係第二個。」
他們預告屆時會上演面貼面的辣身舞，不過當克勤與其他女舞蹈員埋身辣舞時，祖兒自爆在旁邊買定花生等睇戲，克勤笑說：「有女dancer會撩我，每日排到呢度，祖兒就叫我行埋啲，又喺記者面前笑我怕醜，其實我係諗起同尊重人，先唔可以咁樣。」
尷尬話唔使加辣
「怕醜勤」被祖兒取笑後，竟然玩爆料反擊，問到跳辣身舞前可有向另一半備案？二人不約而同咬一咬唇，然後祖兒霸氣地說：「要o架咩？我man唔man呀！」怎料克勤大爆祖兒找男友劉浩龍（師兄）練習辣舞：「我唔喺香港嗰陣，搵條『龍』陪佢練。」全場即時起哄，祖兒撒嬌表示：「搞錯呀！咁冇雷（義氣）！有啲舞蹈要100次去練，所以先要返屋企練。」
問到與師兄排舞可有「加辣」？祖兒面紅紅尷尬說：「唔係呀，唔加辣。」克勤幫忙解圍表示：「咁係團體合作嚟，每人有自己工作崗位，屋企人有屋企人嘅責任去做，提供舒服嘅環境。」克勤提到其中一個舞蹈動作須打橫抬起祖兒，試過體力不支而不慎跣手，又指雙方穿上背心排舞時，身體十足地圖，因他們身上分別有刮痧及拔罐印。
拒絕咀嘴怕鬚拮
由於克勤正在留鬚，祖兒笑言不肯在辣身舞中加入咀嘴情節，克勤指未決定開騷時會否留鬚示人，反而祖兒自爆想獨領風「鬚」：「我都想留，因為框住塊面，塊面會瘦好多，我想留一條，好似京劇咁。」當記者稱祖兒有「留」浩龍時，她即哈哈大笑。
文：音樂組