郭富城風騷晒戒指隨時閃婚

郭富城昨午到澳門為新濠影滙綜藝館的音樂季度啟動禮擔任嘉賓，並宣布將於11月在綜藝館舉行特別版演唱會，打頭陣演出。

城城聯同新濠博亞娛樂高層進行祝酒儀式，預祝演唱會大賣。城城又即場表演幾個舞步作為他這次特別版演唱會的預演。大會為配合城城的舞台王者身份，特別為他設計一個夢幻舞台，讓他能與歌迷以夢幻距離接觸。城城表示演唱會場內設立搖滾區，讓粉絲跟他互動跳舞：「呢個搖滾區係我個人演唱會從來未試過嘅，為咗配合演唱會，我哋設計舞台係專為呢個場館打造嘅，因為呢度嘅設施同新科技先做到，天馬行空亦支援到，係一個夢幻嘅距離，做啲大家意想不到嘅舞台效果，喺歌迷面前跳舞同唱歌，自己喺舞台上從未試過嘅。」

城城左手離奇出現「婚戒」，他解釋只是飾物。	放大圖片	郭富城聯同新濠博亞娛樂高層余耀雄祝酒，預祝演唱會大賣。

至於搖滾區可容納多少粉絲，城城指要等大會安排：「個場館好似可以坐5000人。（到時拉啲粉絲上台？）都有機會。（呢樣哩係咪一直都想做？）一直都想做，喺英美啲國際級舞台都唔容許咁做，會有限制，依家可以喺澳門打造到國際級嘅舞台，同我想突破、破格同創新嘅理念一致，所以佢哋搵我打頭陣時，我哋係一拍即合。（演唱會歷時幾長？）我啲演唱會都係三個鐘，個rundown會重新度過，要配合舞台升降位、視覺效果等，係三面台設計，我會參與開會，好多嘢要重新打造。」

留下愛的抓痕

問到可擔心粉絲有熱情舉動？城城表示：「身為歌手都希望同歌迷互動，想佢哋透過我嘅舞蹈同歌聲，感受我舞台嘅力量。（驚被粉絲抽水？）大會會安排足夠人手同措施應付突發事件，我演唱會有握手環節，試過畀歌迷捉實隻手唔放，仲要拉我埋去，大會都有請保安人員保護我，但握手時都成日會被抓傷，希望大家錫住我，唔好抓傷我。試過畀自己個咪撞親啲牙，依家去握手時識得將個咪放低啲，同埋用手包住個咪，咁撞都係撞到自己啲手指。」

城城續表示不介意歌迷熱情：「最驚啲歌迷捉住我唔放手拉我埋去，我唔想啲歌迷受傷，我愛錫佢哋，我受傷唔緊要。如果啲歌迷唔肯放手，最後都會由保安人員分開我哋，但係我隻手已經有愛的抓痕，我都習慣咗。（今次演唱會只此一場？）序幕嚟，係呢個場館嘅序幕，嚟緊會有個國際級巨星接我棒，我可以成為第一位華人歌手喺度打頭陣演出，覺得好榮幸，今次係特別版演唱會，出年紅館嗰個係另一個舞台同表演項目。今次係好珍貴嘅演出！」

希望成家立室

現場見城城左手無名指戴了戒指，問到他是否已結婚？他說：「只係飾物，大家誤會咗，咁我轉去右手戴喇！（是否反映你想成家立室？）我心入面嘅諗法係，都希望成家立室同有小朋友，我本身好鍾意小朋友，不過現階段我嘅工作好繁重同好重要，媽咪都有叫我抖吓，佢見我辛苦，我同媽咪講叫佢放心，應該休息時會休息。我想有突破階段，努力創一個高峰出嚟，唔容易，會繼續呢個理念。如果達到目標同埋得到大家認同，就去到成家立室嘅時候，都要花幾年時間，可能三年。如果現階段遇到姻緣，亦唔排除會閃婚，都希望得到大家嘅祝福。」