王菀之票房見紅 唔敢亂加片酬

王菀之（Ivana）、陳嘉寶（Anjaylia）、林盛斌（Bob）及監製葉念琛，前晚拉隊為新片《沒女神探》謝票，葉監製讚初挑大樑的Ivana：「套戲開畫票房有8、90萬票房，我好開心，Ivana話我再搵佢，佢唔加價！」

向父母報喜

Ivana初任電影女主角，勁驚青地說：「我第一次咁重戲份，初初好擔心，有票房壓力，前日上網睇仲有好多綠色位未賣，今日（即前日）再睇，紅晒（售罄），我打畀爹哋媽咪，話：『有人買飛呀！』（係咪唔加片酬？）有諗過吓，今次最開心係感受到喜劇可以帶畀觀眾歡樂，（男友有咩評價？）佢未睇，我之前同咗唔同人睇，未排到佢，我想同佢睇正場，睇埋觀眾反應。」

監製葉念琛前晚拉隊為新片謝票。	陳嘉寶建議王菀之可與男友包場睇新片。	王菀之考慮生Ｂ後餵母乳。

在旁的Anjaylia即建議：「不如包場同你男友一齊睇！」Ivana發揮搞笑本領說：「可唔可以唔好淨係同我男友睇呀？」嚇得Anjaylia面紅更正：「我意思係請你同埋你男友睇。」Ivana反建議：「成班演員一齊睇！」

生B餵母乳

另外，Ivana昨日出席「乳癌風險BINGO－乳健教育社區推廣」活動，Ivana對餵母乳減低患乳癌風險的部分甚為關注，問是否想生育？她笑言未試過餵母乳而感陌生，更指日後會餵母乳，問有否跟男友討論結婚生仔？她說：「間唔時，結論係下次再傾。（未婚懷孕？）最好咪啦。」她笑指自己雖是高齡產婦，但現今醫學較昌明，相信年紀大點亦能生育。

文：影視組