陳瀅獲富豪出價200萬開餐
「宅男女神」陳瀅早前推出全裸圖像文學書籍，銷量大賣和反應熱烈，日前接受本報專訪時她驚爆曾在Facebook收到匿名短訊，有人開出高達200萬元的「富豪飯局」價，邀請她一同出外共進晚餐，陳瀅認為此舉令人聯想到是性騷擾行為及利誘進行不道德交易，直斥離譜！
自拍攝無綫劇《四個女仔三個BAR》等劇集後，陳瀅（Jeannie）人氣急升，早前更大膽擺脫清純形象推出全裸圖像文學書籍。日前Jeannie接受本報專訪時，表示為答謝眾粉絲的支持，經常上載不同的工作和生活照上社交網站與大家分享，又會逐一閱畢他們留言，實行進一步俘虜粉絲！Jeannie高興表示新書已加印一倍應付東南亞和美國等地的銷量，現時加拿大為最暢銷地點，又謂新書是限量版，故揚言「清貨」後不會再加印。
如遭性騷擾
談到書中全裸上陣，會否擔心因性感造型而收到「富豪飯局」邀請？Jeannie才驚爆去年曾在Facebook粉絲專頁的Inbox收到匿名短訊，邀請自己出席私人飯局，並以200萬元作為酬勞，她直斥離譜說：「其實早喺拍完《四個女仔三個BAR》後，就有人開200萬價畀我叫我去食餐飯，同我講如果要更詳細嘅時間同地點資料就回覆佢，我梗係冇睬佢，仲即刻刪除咗個訊息，雖然短訊入面冇提及過任何飯局內嘅詳情，但以咁樣嘅價錢去食一餐飯，我覺得會令人聯想到係一個性騷擾，甚至係一個不道德交易！」
Jeannie笑言曾向《四》劇集的監製陳維冠講述事件：「當我第二日見到呢套劇嘅陳監製時，就同佢講拍完你部劇就有人搵我去飯局啦，我仲講不如你帶我去啦，你都姓陳，嗰個人稱呼我做陳小姐，咁你可以同佢講陳小姐就冇啦，陳生就半價畀你啦！」
睇卡士全裸
揚言可接受三點盡露角色的Jeannie表示：「開心多咗廣告同不同客戶問我工作方面嘅嘢。（有冇電影公司搵你拍全裸戲？）暫時未有，係有啲之前傾落嘅微電影，但我知之後嘅工作係冇停手，不斷有新工作。（幾多片酬先肯露三點？）冇話幾多片酬，係睇劇本合唔合理，同埋睇套戲嘅卡士對手，如果好似《色，戒》咁嘅陣容，加上成件事係好嘅就可以接受。」
另外，由婆婆一手湊大的Jeannie，坦言婆婆得知她推出全裸寫真後，未能接受：「佢哦咗我好多日，日日都使出奪命追魂call，話驚我畀人呃，佢真係好錫我。」
文：名人組
服裝：RebeccaMinkOff、b+ab
場地：PizzaExpress@Festival Walk