石詠莉高唱入泓

Sing夢奇緣

「人如果冇夢想，同鹹魚無分別」，但有些夢想卻要付出沉重的金錢代價！

「或者我比較幸運，喺追夢路上遇到生命中最重要嘅兩個男人－男友鄧健泓（Patrick）同音樂夥伴何鈞源，結果相隔數年冇出唱片後嘅今天，可以排除萬難，推出個人專輯，完成心願。

石詠莉憶當年不懂打扮，連自己也頂唔順。	石詠莉已相隔多年沒推出個人專輯。	石詠莉自覺幸運，感謝鄧健泓背後默默支持。

推出呢張『男歌女唱』嘅Hifi碟經歷嘅種種困難，好難一語道破，例如我哋花咗一筆可觀嘅製作費，做咗一首歌嘅demo、落手落腳搬喇叭、膽機等器材到各大唱片公司敲門，卻換嚟一次又一次失望，我曾經好氣餒咁同Patrick講：『不如我放棄啦，我哋用儲落嚟嘅錢去搞個婚禮啦！』不過佢答我話：『結婚OK，但搞一晚嘅婚宴只能畀親朋戚友一個回憶，而理想係唔可以輕易放手嘅。』

（左起）石詠莉當年與陳樂榣、甄詠珊組成組合Freeze出道。

石詠莉有強勁後盾，可放心追音樂夢。

於是我哋花盡血汗錢兼年半光陰，聯同一班音樂戰友自殺式咁博咗一鋪，依家做到嘅成績對我哋嚟講係好正面嘅支持，但坦白講同收支平衡仲有一段距離，但我覺得人生要勇敢面對挑戰先好玩。期望一切能從聲音出發，換嚟一個『全新石詠莉』。」

完美伴侶

兩性關係完美的產生，就是適當時候遇到適當的人，而石詠莉與鄧健泓的遇上，可以說就是這種情形下發生。

「其實大家啱啱識嗰時，我覺得呢個工作上嘅前輩幾型，講唔上好感，但覺得有啲難溝通，後尾有次大家因心事，透過短訊聯絡傾吓……其實我係個唔信一見鍾情嘅人，覺得關係應該由朋友開始發展（成戀人），大家溝通多咗，我發覺佢好有演藝才華，無論電影、舞台劇同音樂都好有自己一套。

拍拖呢兩年幾以嚟，我哋唔係冇鬧過交，呢啲係情侶之間普遍會發生嘅事，大家都需要時間磨合，不過我可以講，呢段時間我哋好開心，亦覺得自己係幸運嘅，遇到一個比我仲要關心我夢想嘅人，至於結婚……相信冇咁快，但確實我哋係朝住呢個方向出發。

我喺唱片『致謝詞』嗰陣，由衷咁寫咗：『最後……身兼攝影師、燈光、美術、音樂導師、精神支柱的那位，是你讓我找回了自己，你的指引，令我成為更好的那個我，多謝您。』某人請自行對號入座。（容許我放一吓閃光彈吧，哈哈！）」

改頭換面

當初被安排以組合成員身份入行，走性感路線給人辣妹感覺，石詠莉心想不是有太多人了解她的「過去」。

「出生自水上人家嘅我，最難忘求學時期鍾情水上活動，皮膚曬到黝黑，又唔會花時間美容，鐵線髮質加金絲眼鏡嘅造型，諗番起就連自己都頂唔順，直至有日搭港鐵遇到『星探』，做咗模特兒賺錢養家，先發現打扮其實好重要。

入行後喺追求音樂夢嘅同時，我發現自己患上抑鬱症，覺得嚴重缺乏愛，起初無緣無故匿埋一邊喊，終於被身邊朋友發現，叫我去睇醫生，背負養家壓力嘅我知道唔可以畀自己任性落去，經歷咗半年先成功戰勝病魔！

講開又講，當時面對嘅難關，唔可以淨係歸咎人哋，因為嗰陣時我嘅性格倔強、任性，做人又太自我，某程度上好乞人憎。經歷咗人生種種，先明白同珍惜自己擁有嘅，希望換嚟更加好嘅自己，日後都能夠隨心做自己鍾意嘅事。」

後記：背後男人

相約石詠莉做訪問，鄧健泓自然亦有現身。訪問構思、女友妝容，借場以至交通，統統都有份在背後出力，甚至比自己當主角還要緊張，唯獨記者要求一齊做訪問或拍照，平日「順得人」的他卻斷然回絕：「唔係幾好嘞！」

甘願當「背後男人」的鄧健泓更為女友鋪路：「佢呢條路咁唱落去，第二時結咗婚都可以繼續有自己嘅事業嘛！」有這樣的男友，果真夫復何求！

文：影視組　

攝：司徒國榮　

服裝：N21H　

髮型：Casei＠i hair & nails