雨僑基不可失搲做嘉賓
神隱多時的鄭中基（Ronald）前晚終於現身谷戲，與雨僑出席新片首映禮，他更宣布明年開演唱會，雨僑以「Ronald係我N年前鍾意的歌手」，欲自薦做嘉賓，似暗示Ronald相隔十年才開騷要人等得太久！
藝人鄭中基、雨僑、莊思敏、王宗堯、蘇民峰、導演胡耀輝、電影公司老闆蕭定一等，前晚出席新片《猛龍特囧》首映禮，Ronald之前因事缺席電影宣傳，他解釋：「係呀！之前忙拍戲後來又病，老婆都病埋，依家好番！我仲肥咗少少。（落實明年開演唱會？）入紙攞住3場先，上次開騷我仲話希望唔使等十年，點知真係等十年！（你執導講海盜張保仔嘅電影《神秘寶藏》進度點？）要用多兩、三個月做特技，（會探聽無綫套《張保仔》幾時上？）唔會啦，如果播，佢哋都會大事宣傳。」
莊思敏不談是非
雨僑得悉Ronald將開騷，想自薦做嘉賓，她說：「佢係我N年前鍾意嘅歌手，乜歌我都識唱，但佢嘉賓應該好多，或者佢想一個人唱晒呢！」
莊思敏則拒絕再提與苟芸慧點心店股東的是是非非，她說：「股東間有共識，唔再講，亦唔再評論，情願集中為舖頭宣傳。（同苟芸慧通過電話？）我哋私下搞清楚發生咩事，詳情唔使公開交代。」
文：影視組