回巢拍劇 古巨基拖字訣
歌手古巨基、林子祥前晚為節目《今晚睇李》任壓軸嘉賓。李思捷大爆古巨基原本答應任首集嘉賓，但因檔期問題，改為任壓軸嘉賓。古巨基坦言已有一段時間冇到電視城，綵排時與訓練班新人傾偈感到十分親切：「佢哋係第28期，我係第4期，令我諗番起嗰陣日子。（有興趣回巢拍劇﹖）其實我仲欠TVB兩套劇，不過欠住先啦！」
而同場的林子祥則表示有留意李思捷過往模仿其唱功：「佢好有喜劇細胞同掌握到timing，所以咁成功。佢話聽我啲歌40幾年，話我啲歌影響到佢。Talk show唔易做，要做到恰到好處，每個嘉賓都唔易對付。」