方力申加對白 插Stephy難頂
方力申與鄧麗欣（Stephy）在葉念琛電影系列中成為家傳戶曉的銀幕情侶，二人其後更戲假情真，今次在葉念琛牽引下再拍新片《紀念日》演活情侶關係。二人在戲中不斷加插真實相處對白，小方乘機埋怨：「你估你真係咁易頂？」
藝人方力申（小方）、鄧麗欣（Stephy）、邵仲衡及李麗珍（Rachel）等，昨日出席由葉念琛執導新片《紀念日》的開鏡拜神儀式。小方與Stephy的情侶形象早已在多年前的電影《獨家試愛》被奠定，多年後二人發展成真實情侶。今次葉導再穿針引線找來二人主演新片，小方笑言：「十年前我哋係假嘅，唔係情侶扮情侶，十年後係真，真係情侶。」
借鬧交戲發洩不滿
為增強電影真實感，小方和Stephy將平時相處對話化成對白。雖然小方認為能夠演回自己感覺較易，惟Stephy就直認感覺古怪：「好似將啲生活放出嚟畀人睇咁。（戲內有鬧交？）好多。（將平時忍讓的都發洩出來？）又唔係咁講嘅，借啲意囉。佢有句對白我好深刻，聽完好難受，佢話『我愛你先至呃你，如果唔係都捱唔到十年啦！你估你真係咁易頂？』」小方續說：「好爽，我加(口架)呢句對白。（Stephy好難頂？）我投入個角色去加呢句對白啫。（又話演番自己？）個性格係我啫！」
大時代戀人有默契
除小方與Stephy外，葉導今次亦找來另一對經典情侶，在無綫神劇《大時代》中的邵仲衡與李麗珍！李麗珍在訪問時向邵仲衡笑言：「爭在當年你掟我落街囉！」不過邵仲衡都直認二人有120%默契和滿足感，更自爆與對方演感情戲時一度哭不成聲。
文：影視組