丁子高周旋10女忙過湊仔
廿四孝老公丁子高（Real）昨日撇甩老婆楊千嬅，與一班名模及名媛好友共十人在中環歎下午茶，由於人數眾多，名模與名媛分兩枱坐，Real一人周旋十女之間，不時在兩枱穿梭，簡直忙過湊仔！已為人父的Real笑言跟席上媽咪級好友請教湊仔心得，時刻心繫家人。
丁子高與楊千嬅剛拍畢內地節目《極速前進》返港，昨日Real即相約一班女性好友敍舊，下午四時許，Real與黃佩霞先在商場內的餐廳現身，兩人坐在長枱閒聊，其後名模歐陽妙芝、馬詩慧、洪華、琦琦及周汶錡陸續加入，由於全屬高人一族，分外顯眼，Real跟六位名模邊吃邊傾，表現投契，其後藝人唐文龍亦到達加入「吹水團」。
替好友拍照
同場不遠處，四位名媛包括恒生新抱何倍倩、周國豐太太黃泳霖、龐維新太太董晶怡及羅氏針織後人羅可旋坐在另一枱，Real跟名模傾完一輪，便轉枱到名媛那裏，坐低再食再吹水。之後Real不時游走兩枱，照顧名模及名媛兩邊，更替名媛好友用手機拍照，認真分身有術！
事後致電Real，他表示前日才由內地返港，由於之前一直拍攝內地節目，跟眾好友久未見面，故約齊眾人歎下午茶，他說：「我哋喺兩個星期前已經約定，其實以往都會約出嚟見面，但好難得好似今日（昨日）咁齊人。我都有同佢哋講吓我之前喺大陸拍嘢嘅趣事，同Anina（何倍倩）佢哋就主要講吓湊仔經，請教吓關於小朋友入學嘅嘢，因為佢哋好有經驗。」
文：名人組
攝：追蹤組