楊秀惠姣電人夫 癲喪博出位

無綫小花楊秀惠最近憑熱播劇《鬼同你OT》中飾演「Lolita」而彈出,雖然都是Sell靚樣,但人物性格上卻有大突破!她要在劇中不停「發姣」狂電男主角陳豪,將平時「癲喪」一面放大10倍,又笑言初時感尷尬,但多謝人夫陳豪教她「勾引」技巧與招式:「佢仲話我知可以掂佢邊度!」

於剛播大結局的《鬼同你OT》飾演女配角「Lolita」的楊秀惠,坦言當初接到劇本時感擔心,怕觀眾接受不到她不斷搔首弄姿:「自己做呢類型角色,驚觀眾會唔鍾意!都發覺個角色幾瘋狂,好擔心掌握唔到佢嘅性格,已經同監製討論過幾次,之後到現場就同阿Mo(陳豪)、阿田(田蕊妮)同定欣(胡定欣)佢哋傾,真係好多謝佢哋幫忙,令呢個角色更加發揮到佢嘅特色!」

邪花人氣爆登

獲讚演「Lolita」做得自然,秀惠表示要將平時自己「癲喪」的一面放大10倍:「冇人誤會我現實生活都係咁,只係問呢個角色係咪得楊秀惠可以做!做呢個角色嘅方法就係將某啲嘢放大,有時現實生活中都可能會有啲癲癲喪喪嘅舉動,咁就將呢個我放大嚟做,將眼神加強10倍!入面好多勾引阿Mo嘅場面都係佢教我,佢會建議我點對佢,啲表情、動作、聲音都教晒我,又話我知可以掂佢邊度!」

被封「邪花」的秀惠笑言觀眾都叫她「蜘蛛精」,明顯感覺到人氣比以前高:「我去飲茶啲姐姐會叫我『蜘蛛精』,又好開心咁話要同我影相,好鍾意呢種感覺,覺得個角色好成功!」

文:陳丹

攝:劉斌

場地:Pizza Express@中環威靈頓街

服裝:112 mountainyam

髮型:Tim Chong@LA BIOSTHETIQUE