Ronald百厭笑匠娛樂大家

鄭中基（Ronald）與《一路向西》導演胡耀輝合作新片《猛龍特囧》，Ronald表示從未演過如此百厭的角色：「呢個角色係一個喺黑人區大嘅人，比較hip hop，講嘢又夾雜啲英文同唔係好明嘅廣東話，我未演過呢類型嘅角色，所以覺得幾得意。」

近年Ronald演過無數角色，騎呢二世祖、暴發戶甚至海盜都扮得相當神似。他於另一部電影更一嘗導演滋味，問Ronald目標是攞影帝還是最佳導演？他竟說：「我只係想拍一啲大家睇咗會開心嘅喜劇，唔想有乜嘢包袱（指攞獎），因為愈想只會愈偏埋一邊。（你有兩個小朋友，會唔會想演爸爸角色？）都想，但要有啱嘅劇本。」

雨僑食暈浪丸

Ronald與胡耀輝於戲中不停放笑彈，兩人更大爆女主角雨僑用「秘密武器」來應付厚過「厚多士」的千度近視眼鏡。胡耀輝說：「有一日我發現一排暈浪丸，原來雨僑因為戴千度近視眼鏡見暈，所以就食暈浪丸抗衡，佢仲話食咗high high哋都幾好。」Ronald亦說：「總之我都食埋一份，預防一吓啦。」

提囡囡冧到爆

Ronald細仔現四個月大，英文名叫Evan，Ronald自言是湊仔熟手技工，不用開工便會在家中當「夜更」幫囝囝換片。提到四歲的女兒Emma，他即一副冧樣地說：「今年父親節唔係一日，係一個禮拜。佢同佢媽咪去超級市場買嘢，一定要買我最鍾意嘅花生朱古力畀我食，又劃父親節卡畀我，有時有所要求嘅時候，又會用一啲好甜嘅眼神望我，哈哈！」難怪Ronald願意為女兒盡量向煙和粗口「say no」。

文：影視組

場地：Hotel Icon

鄭中基

髮型：Horace Tse@QUEEN'S PRIVATE i SALON

Makeup：Mon Chun Wardrobe：5cm

胡耀輝

Make Up：Aster Phang Hair：JJ@CAPELLI