周汶錡產後弗爆復工
剛升任新手媽媽的名模周汶錡（Kathy）自上月初剖腹誕下囝囝Jacques，昨日首次出席嬰兒護理品牌活動。坐月完畢的她極速修身，首日復工即分享湊B開心事：「我好乖坐月坐足一個月（口架）。因為有好多朋友嚟探BB，所以比想像中快過。我覺得換片、沖涼最難，因為佢好細個，驚整親佢。佢依家重咗2磅，9磅幾，希望之後易啲湊。」
她笑言囝囝眼仔睩睩的眼神似足自己，又大爆老公Julien現回家只會攬囝囝：「佢一放工返嚟就攬實BB，之前同我講嘅甜蜜說話都對晒BB講。佢有嘗試餵奶，但仔仔好百厭，唔食爹哋餵嘅奶，同埋佢開始會整蠱我，一準備餵佢食奶就咪嘴。」至於會否舉行百日宴，她則謂：「諗緊，我好攰，其實所有朋友都見過晒BB，搞都冇咩意思。」