田蕊妮首放笑彈老公讚掂

藝人田蕊妮（阿田）入行後出演過多套劇集，她憑住自然流暢的演技順利入屋，更於2013年以《巨輪》中「姚文英」一角勇奪視后寶座。然而她日前卻獻出「第一次」於無綫劇集《鬼同你OT》首演喜劇角色，更直言為此擔心不已：「我唔係嗰種一行出嚟就好笑嘅人，我（收到劇本後）覺得死喇，不斷好緊張咁諗要點演同鋪排笑點。」

心靈相通

阿田又自爆冒住捱鬧的風險，向擅演笑片的老公杜汶澤請教：「因為我突然好似新人咁問佢喜劇點樣做，我驚畀佢鬧『你依家係新人呀！』」

談到老公，她即「小女人」上身，表示獲對方sweet爆賜教及讚賞：「我哋兩個結咗婚咁多年，其實我未講出口，佢根本知我諗咩。佢知我演喜劇好緊張，佢就話『演喜劇同演其他戲一樣，而且幽默感同演技你已經有（口架）喇，你唔使擔心啦。你要相信你自己，要享受過程！』」

自認hea底

談到阿田首演喜劇即好評如潮，問到她較愛演喜劇或是注重內心戲的劇集？阿田直言不會自設框架，但亦享受化身Hea底角色：「咩（劇）都試下，人哋都冇框住我，我點解要框住我自己？（今次被讚表現自然兼搞笑？）我同孫淑梅（《鬼》劇角色）唯一最似就係懶床，死都唔肯瞓醒！我真係做番自己，好享受飾演咁hea嘅角色，可以名正言順做緊嘢時hea！」

提到她與胡定欣於劇中一幕「神同步」引來網民熱議及推舉作競爭視后，阿田笑言未敢諗獎項：「當然冇諗過啦，喜劇題材比較難，我不嬲唔諗（獎）。最緊要依家嘅反應，觀眾睇得開心已經好足夠喇！」

文：影視組