呂方唱周董出動五十人樂隊

呂方將於九月四及五日在紅館舉行「呂方代表演唱會」，演出經驗十足的他首度與五十人大樂隊合作，現每天都會將演唱會Rundown唱一次，要練聲、練氣、背歌詞。呂方又大爆屆時會唱別人的歌：「好似葉德嫻、林憶蓮、周杰倫、梅艷芳、張國榮，佢哋嘅歌大家都識，就聽吓我唱又會點呢！」

登台緊張忘詞

久未在港開騷的呂方坦言今次演出心情緊張，因他性格愛胡思亂想，笑言擔心唱唱吓跌落台，又怕會發台瘟，他謂：「早幾個月喺三藩市登台，唱《流浪花》時腦海一片空白，未試過咁發台瘟，我估計係食咗安眠藥再加時差出事，好得人驚，搞到我有無形壓力。」為怕再忘詞，呂方使出獨門秘方「背默」，邊唱邊默最有效。更會出動汪明荃做個唱嘉賓，呂方稱要給大家新鮮感，並指汪明荃做事認真又爽快答應，要送禮物答謝對方。

等紅館期三年

原來呂方本打算2013年在紅館開30周年的紀念演唱會，但由2012年一直入紙，最終等到今年紅館先有期，呂方謂：「眨眼就三十幾年，睇番80年代歌手，雖未係表表者，但都係大家記得嘅歌手，可能後生一輩歌迷唔識我，但慶幸自己仲有機會開演唱會。」文：音樂組　攝：黎志輝

場地：Alice Wild Luscious PMQ

髮型：GarySun@HairCorner

化妝：Polly