陳家樂 衛詩雅 奉旨約會
全城「公主熱」，就連英皇藝人也拉隊往主題樂園「朝聖」，與大班小朋友同場欣賞表演重拾童真。曾傳緋聞的陳家樂及衛詩雅同遊樂園，雖然有「電燈膽」湯怡及麥子樂，二人仍玩得相當投入！
藝人平日工作繁忙，陳家樂與衛詩雅日前終有機會偷得浮生半日閒，相約剛加盟英皇電影藝人部的麥子樂及湯怡暢遊主題樂園「追星」，密會全場熱爆的Anna及Elsa公主，齊齊體驗「冰雪魔力」﹗兩pair人欣賞歌舞表演時顯得相當投入，跟着打拍子及和唱，十足小朋友。
一口氣坐十次過山車
事後詩雅還意猶未盡，被家樂取笑：「佢跟住人唱，但高音唱唔到！」詩雅即謂：「我真係好鍾意嚟主題樂園，記得有年生日入嚟玩，一口氣坐咗10次過山車，返到屋企竟然發燒，下次惟有只坐9次囉。」家樂搶說：「我最勁試過一年內嚟咗8次，主要係做嘢，包括入嚟拍通宵戲。我好熟呢度，連工作人員休息室都知喺邊！」
麥子樂愛拍拖睇煙花
如果不提或者大家已不記得，家樂與詩雅曾因同遊另一主題公園被偷拍，加上結伴現身書展，搞到緋聞傳足幾年。兩位當事人搞笑謂：「係囉，今年唔敢再約去書展，做咗咁多年（娛圈）都係靠呢單嘢畀人記得。」湯怡聞言即向家樂說：「咁不如約我啦。」家樂回道：「吓？﹗唔得喎，我驚畀人尋仇，一係約埋佢（洪卓立）。」外表柔弱的湯怡原來膽識過人，現身主題樂園「主攻」過山車及跳樓機，反觀「大隻仔」麥子樂則覺得於主題樂園的煙花下拍拖才最浪漫。
文：影視組
攝：秦健輝
服裝：CHOCOOLATE@I.T（陳家樂）、quarter（湯怡）、SPORT b.（麥子樂）