錢嘉樂喊住慶生
錢嘉樂昨日五十歲生日踏入人生另一階段，佗住第二胎的湯盈盈帶同女兒突然現身宣傳活動，令堂堂大男人嘉樂也感動得眼濕濕，嘉樂咀完盈盈又與老友洪天明錫錫，場面溫馨又搞笑。
無綫劇集《拆局專家》演員錢嘉樂、洪天明、黃智雯、朱晨麗、朱千雪、張美妮等水戰谷劇，張美妮更被天明不停扔落水，眾女亦難逃濕身命運，天明笑謂若收視有50點，朱晨麗會全裸答謝觀眾，十分搞笑。
催BB快出世
而昨日為錢嘉樂五十歲生日，大住肚的盈盈帶同女兒Alyssa神秘到場及準備巨型跑車蛋糕，令嘉樂感動得眼濕濕，先後咀盈盈及女兒，十分溫馨。最搞笑的是天明也要求與嘉樂錫錫，壽星仔也有求必應。
嘉樂講到生日願望希望第二個BB出世後，一家四口可以出街食餐飯慶祝，他說：「原本生日諗住請假，但係唔想《超強決戰1分鐘》剩番森美一個，今晚收工再同老婆去食飯消夜。好多謝老婆蛋糕寫25x2，等我同校長一樣年年25歲。」
朱晨麗與朱千雪皆穿得密實，朱晨麗受訪表示：「自己唔識游水，所以都有啲驚，已經打好晒底，我有着泳衣喺裏面，等我下次做第一女主角先着泳衣出嚟啦。」問到收視好會否着泳衣亮相？朱千雪笑說：「話有50點朱晨麗全裸嘛，我着泳衣都冇用啦。」
文：影視組