千嬅鬥牛場出事 撞到瞓低
歌手楊千嬅早前到西班牙拍攝內地真人騷，在鬥牛場取景時突遭公牛從後撞跌，嚇得場邊的老公丁子高尖叫狂奔。幸而千嬅僅擦損手最後仍堅持完成拍攝，痛在心的丁子高大讚老婆犀利，心口堅有勇字。
楊千嬅、丁子高、曾志偉、曾寶儀、鄧紫棋及台灣歌手張芸京等，早前接拍內地真人騷《極速前進2》。今晚將播出眾人在西班牙馬德里鬥牛場作戰情況，近日網上瘋傳一段千嬅企在鬥牛場邊等埋位時，遭發狂的公牛突擊撞到瞓地的短片，嚇得企在另一邊的丁子高冒被「狂牛」亂撞危機奔跑睇老婆。
負傷照比賽
經在場醫護人員檢查後，幸而千嬅只是擦損手，起身堅持繼續拍攝的她，猶有餘悸說：「有驚無險，撞到嗰刻都好驚，腦海一片空白，不過個人係清醒，好彩冇傷到骨，見冇事咪繼續比賽。」千嬅指拍完才識驚，飛車去醫院照X光：「好清楚檢查過啲骨冇事。」
發聲明致歉
親眼見老婆被牛撞跌的丁子高坦言束手無策，當刻反應是去睇老婆：「嗰刻嚇到呆咗，來不及反應，過咗幾秒先識嗌同衝過去，場面都幾驚嚇。」丁子高透露曾想過停拍送老婆入院：「醫護人員檢查完話佢冇事，千嬅又堅持比賽，我覺得老婆好犀利，真係見識到佢心口有個勇字。」此外，電視台昨日亦為千嬅被牛撞的意外發聲明，向千嬅再三致歉，承諾加緊保安環節。
文：音樂組