楊紫瓊年底嫁法拉利總裁

國際影星楊紫瓊（Michelle）昨到山頂為其新蠟像揭幕，身形清減不少的她說近期忙於拍戲，又謂早前撇低法拉利總裁未婚夫Jean Todt，遠赴印度爬山、睇廟宇：「我都爬咗四千幾、五千米，頭幾日直頭起唔到身又頭痛，要吸少少氧氣再跟人哋爬。（未婚夫同行？）冇，我驚佢行半日就要人抬落山，但佢依家好乖，應承咗我有樓梯就唔搭(車立)，依家日日行都瘦咗。（為結婚作準備？）係，希望今年結婚。」Michelle說經常要開戲，所以難抽時間搞婚禮，加上父親去年尾逝世，故婚事預計年底或明年初進行。她稍後會拍西片及美劇，工作則排到11月初。問會否在港搞婚禮？她笑道：「最好係靜靜雞結婚，再去每個地方開派對，因為一搞大婚禮就同朋友分享唔到，最緊要喺馬來西亞同香港開派對，到時一定通知大家。」