崔建邦粗口送飯女友豪飲打氣

崔建邦入行以來是非不絕，曾因醉駕被罰停牌及涉打前女友鄺敏慧，之後被無綫燉冬菇，由金牌司儀變為助理編導，至2011年再獲無綫器重，近年與唐詩詠甩拖後，搭上「翻版千語」陳嘉莉。

隊20杯清酒

事業愛情兩得意的邦邦，昨日凌晨與女友和朋友到廟街一餐廳擦海鮮，他一抵達已向友人「示威」：「啱啱飲咗20杯清酒！」餸菜上枱後，邦邦即餓狼上身狂擦，但仍不忘夾餸給女友。

食飽的邦邦豪情撩牙。	講得興奮，邦邦索性站起來加強氣勢。	陳嘉莉（右）全程狂飲啤酒。

狂爆一分鐘

期間邦邦又食家上身與友人分享海鮮經，由於同行有台灣朋友，他即席發揮司儀級口才，用兩文三語介紹香港海鮮。未知是否幾杯落肚，他竟「酒後吐粗言」，為與朋友爭論食物質素在一分鐘內爆粗八次：「我想講唔X得囉……我喺街市買40蚊咁X大隻蝦……是但啦，平兩舊水都冇X用！」

到飯局尾聲，邦邦繼續霸氣爆粗，他問朋友吃飽未，友人示意未夠，他激動得比店內海鮮還要生猛：「你仲講乜X嘢呀？」邦邦酒後「三字經」出口成文，女友Kelly亦「酒」味相投，全程喪隊啤酒，更舉手向店員叫啤酒。最後飲飽吃醉的邦邦發現記者全程直擊其「爆粗真人騷」，即急急埋單閃人！

文：音樂組