黃榕收斂姣味執三攤扮斯文
李逸朗（Don）、樓南光等主演新片《男極探射燈》幾經波折，前日終於在荃灣某工業大廈正式開拍，女主角由新人楊子瑤頂替特首女兒梁齊昕，本來「牛雜妹」李美琪擔任的第二女主角，繼宣布換上蔚雨芯（Rainky）後，最終落實由「寫真界元老」黃榕「執三攤」。飾演斯文社工的黃榕，一改拋胸、露腿性感形象，以粉紅色連身裙包到冚，「峰」頭被艾美琦（Amy）蓋過。穿上低胸背心大晒三吋事業線的Amy則扮演新移民性工作者，令黃榕不禁大呻：「佢好性感，搶晒鏡！（被搶風頭？）唔介意，我係演技派。」
楊子瑤ＮＧ八次
自稱「影圈新人」的楊子瑤，前晚拍攝一幕邊食飯邊煲劇戲，簡單的兩句對白也足足ＮＧ八次！隨後，接見Don和Amy的文戲更拍了兩個鐘，經導演劉俊輝耐心指導後，順利完成。黃榕趁未埋位也捉緊時間咪熟劇本，她坦言角色挑戰大、壓力大：「今次好考演技，佢哋叫我講嘢唔好咁姣，我都上網狂loop片，學羅霖姐姐斯文、成熟嘅口脗。（執三攤？）有戲拍就好開心，多謝佢哋唔拍。」
李逸朗唔似嫖客
問到有否「撳鐘仔」的放蛇戲？飾演記者的Don笑道：「有，但唔係我做，佢哋話我個樣唔似嫖客，Ben（杜浚斌）個樣鹹濕啲，Eddie（彭懷安）都唔弱。」提到該片多次換角，Don搞笑自嘲：「好多電影都係咁，以前通常換走我，最後平安開到，我好開心。」
文：影視組