詩詠嫌棄洪永城暫時分手

藝人唐詩詠及張繼聰昨日於新達廣場出席「新達廣場 X Rody夏日沙灘派對揭幕禮」，與觀眾大玩遊戲和分享消暑心得。穿上小背心和短褲的詩詠透露小時候家人不讓自己到沙灘游泳，所以今年有意舉行首個沙灘之旅，並預告穿三點式上陣。問到可會邀請緋聞男友洪永城（Tony）同行？她笑說：「邊個朋友得閒就一齊去！不過唔知佢識唔識游水，唔識就唔好喇，仲要我救佢！」

計劃旅行當背包客

她又提到近日Tony忙於拍攝劇集《實習天使》，未有時間見面，但就被對方飾演的「魔鬼教官」嚇怕：「佢依家拍劇變咗另一個人，我哋未有時間相處，但睇相都覺得好唔同，所以都係唔好見住，等佢離開咗呢個角色先！」拍攝完《公公出宮》的詩詠表示之後可以享受假期，現正籌備一個人的背包旅行，但仍未決定目的地：「呢啲事依家唔做將來都唔會做，所以難有假期就想體驗吓！」她又謂知道Tony有類似的經驗，會向對方徵詢意見。

張繼聰沙灘怕走光

而張繼聰表示每逢夏天都會帶兒子張瞻到沙灘玩，問到會否穿三角泳褲？他笑說：「我多數着衝浪褲嘅，因為同小朋友玩好體力勞動，佢玩橡皮艇係靠我發動嘅，又要抬嚟抬去，所以都要做足預防措施，我怕男人都有機會走光！」

文：音樂組