周秀娜投資百萬Bra閉巡舖
「性感女神」周秀娜（Chrissie）去年年底建立自家內衣王國，終由網店發展成實體店，凡事親力親為的Chrissie，除為品牌做「人肉生招牌」外，日前更到尖沙咀「微服巡舖」，親自執Bra兼做埋收銀，由於舖頭仍處於試業階段，Chrissie表示預計在今個月內正式開張大吉！
「宅男女神」周秀娜（Chrissie）憑32D驕人上圍為人熟悉，近年踩入商界做老闆的她，去年年底建立自家內衣品牌，主力以網購為主，而Chrissie揚言希望在三年內上市，及在年底開實體店。
不過，Chrissie未夠年底就已經達成願望，日前傍晚見她與助手現身尖沙咀小型商場，「微服出巡」到自家內衣品牌LaaNaa首間實體店視察。雖然舖頭仍處於試業階段，但亦不乏顧客問津，當Chrissie一現身，店內員工便上前打招呼，又向Chrissie遞上店舖圖則及單據，並帶她巡視店舖狀況，當Chrissie走入試身室和其他角落，見到試身室旁有個人內衣肖像牆紙作「生招牌」時，即笑到四萬咁口，似乎十分滿意。
今個月內開張
之後Chrissie化身「收銀員」為顧客服務，見她十分熟手向店員示範，及後她到貨架前研究，似乎對貨物擺放位置不太滿意，於是即落手落腳執Bra上架，並十分有耐性地多番提點員工。據知Chrissie今次為新舖投資逾百萬，事事親力親為。
事後本報致電Chrissie，詢問新舖開張事宜，她表示希望在今個月內開張大吉：「新舖好快開張，自己都緊張，因為話晒係第一間實體店，都想正式開張前再去望一望，等個心定啲。（新舖預備成點？）依家我哋係試業階段，基本上已經有客人上嚟睇，其實依家新舖已ready，係差啲細節位。（幾時開張？）預計今個月內。」
多聽客人意見
而Chrissie表示日後亦會經常巡舖聽取客人意見，她表示：「我好鍾意個試身室，我係女仔會想好似入到自己嘅衣帽間咁，嚟緊睇吓反應點。（投資幾多錢？）實際投資幾多我都唔清楚，因為有同其他人合資。（你自己拎幾多錢出嚟？）投資少少啦，淨係舖頭都過百萬。」
文：專案組