(4)龐卓欣苦練擘腿 舞輸蝕
昨日12位港姐齊齊為主題曲MV排舞，出名舞藝高強的「高挑Charlie」(1)麥明詩（Louisa）卻大跌Watt，慘被宿敵「寸嘴Ada」(4)龐卓欣搶盡風頭，但Ada仍為對方笠高帽：「我跳舞冇Louisa咁勁！」更稱要苦練擘腿。而「眼科醫生」(12)朱嘉莉（Sunshine）就自爆靠營養師餐單搣甩脂肪勁減8磅！
《2015香港小姐競選》12位候選佳麗昨日聯同歌手許廷鏗、胡鴻鈞和鄭俊弘，到觀塘為港姐主題曲《一夜成名》MV排舞。賽前大熱的「高挑Charlie」(1)麥明詩在日本集訓時經常大騷舞技，又擘腿又拗腰，但昨日卻絕技欠缺大跌Watt。相反宿敵「寸嘴Ada」(4)龐卓欣就相對搶鏡，但她卻坦言跳舞並非強項，唱歌才是專長：「我跳舞冇Louisa咁勁！」因她做不到擘腿動作，仍要苦練：「始終都唔想失禮自己，都會想型啲、好啲！」希望在台上一展歌喉的她，又指演技方面最難做好。
飲水排毒
至於「眼科醫生」(12)朱嘉莉（Sunshine）就頻頻甩Beat，訪問時她笑謂：「未Ready啫，跳舞都有少少難，好似記啲舞步咁。」更指自己舞底近乎零：「我係書蟲嚟！」報名參賽時體重有120磅的她最近清減不少，她坦言三星期前開始跟營養師餐單減肥，現時瘦了7、8磅：「食菜、食雞胸肉，或者魚，仲要飲好多水排毒。（頂得順？）頂得住！」又指自己仍有進步空間：「最緊要健康咁減啫！（仲想減幾多？）其實冇，我最憎成日磅住自己，最鍾意自然咁減，努力就得。」
許廷鏗認輸
談到排舞情況，許廷鏗自言舞技比起佳麗相形見絀：「我啱啱開始咋，畀啲面啦！」而胡鴻鈞就大讚佳麗捱得：「個個都好似唔使瞓！」至於同場的鄭俊弘前晚出席無綫節目《放榜前的一個晚上》時，被問到會否在9月的音樂會中跳舞？他笑謂：「要呀，我OK(o架)，畀啲信心我。（係咪舞『癡』？）係打功夫個『武癡』，但我就舞『癡』唔晒。」
文：影視組