高海寧胸大有腦 22分女神

昨日中學文憑試（DSE）放榜，有別於DSE，許多藝人都經歷過會考階段，當年會考獲14分或以上便符合升讀預科資格，於網上瘋傳的藝人會考成績中，發現不少八十後「宅男女神」除了外表「煞食」，亦相當有腦！藝人高Ling除了形象性感，原來會考更獲得22分好成績，認真「估你唔到」！入行之後，高Ling不時以公開試過來人身份勉勵粉絲，她謂：「有時知道粉絲要考試，都會喺網上私訊同佢哋打氣。（有冇粉絲曾經向你報喜？）我fans club會長考DSE前已經跟緊我，依家佢已經做緊實習護士，有時我有藥物問題都會請教番佢。」高Ling又表示自己一向讀書成績不錯，故會考放榜前夕都沒有太擔心，原本預計自己必定有14分以上，但她和父母都想不到竟然考到22分好成績。

翠如講威水史喪喊

至於翠如BB當年會考獲得1A5B，相當於25分的佳績，順利升讀預科之餘，其後更入讀浸會大學傳理系，本報記者問到翠如BB如何勉勵考公開試的粉絲，她謂：「有fans都同我講成績，當然有啲好，有啲唔好，不過呢啲都係小朋友嘅經歷。」提到昔日會考威水史，翠如BB說：「當年其實不論考得好唔好，都好多愁善感，成績好唔好都圍埋一齊喊，依家諗番起個感覺都幾sweet，不過成績唔好唔代表乜，長大咗唔會影響生活。」

黃翠如 25分	雨僑 26分	鄧紫棋 21分

雨僑勉考生出路多

另外，於傳統名校英華女學校就讀的歌手雨僑（Ava）當年會考獲得26分佳績，其後成功考入香港大學生物系，記者問到Ava當年會考成績好勁，她謙稱：「其實唔勁，可能係環境關係，會考26分原校升中六已經係墊底分數！」提到以前讀書情況，Ava表示非常辛苦和大壓力，而且將全部青春都投放讀書，她憶起當年會考考數學時，更一度「考到嘔」：「因為對呢科好有期望，喺試場嘔出嚟除咗尷尬，仲足足蹝咗廿分鐘。」她亦鼓勵應屆DSE考生毋須因為成績不好而過分憂慮：「環境許可嘅可以重讀，若覺得自己已經盡力，就唔使唔開心，或者可以學其他嘢。」

歌手鄧紫棋（G.E.M.）雖然讀書時期經常參加大大小小的歌唱比賽，但仍兼顧學業，會考亦有21分，惟直至截稿前G.E.M.未有回覆。

文：專案組