劉佩玥男女通殺 一親「香」澤
港姐劉佩玥昨日為新劇開工，並透露劇中有場沙灘戲，但自己未必會以三點式上陣，可能要留給同劇的岑麗香操刀。劉佩玥更笑言自己可能會獻出螢幕初吻，期望對手會是岑麗香。
藝人劉佩玥（Moon）、岑麗香（香香）、吳若希及吳沚默等人，昨日在馬鞍山郊區拍攝無綫劇集《實習天使》，飾演學護的她們被魔鬼教官洪永城帶來荒山野嶺完成任務。由於天氣酷熱，不用埋位時各人盡量在樹蔭下避暑，以免溶妝。
拍沙灘戲有驚喜
剪一頭清爽短髮的Moon表示角色個性男仔頭，問會否擔心流失男Fans？她說：「唔會！相信男同女仔都會鍾意，因角色性格活潑、率直，會引起好多笑料。」Moon又透露稍後會有場沙灘戲，問到會否穿三點式？她說：「未知呀！我未必會，或者留畀香香同吳若希。（咁你咪輸囉？）可能有其他事畀到大家驚喜呢！（例如？）可能、或者、未知會唔會獻出螢幕初吻呀！（對手？）未知呀！（係咪同性？）唔係！雖然我外表係男仔頭。」問到最想錫邊個？她竟搞笑表示想錫香香：「我入行前已經好鍾意佢！今次合作到，仲要做最好朋友，Perfect！」其後兩人合照作狀錫錫，感情要好。Moon又指有機會與另一位女神陳煒有對手戲，感到開心。
餵蚊好過着古裝
香香表示今次與劉佩玥一組，吳若希則是對手，劇中有好多內鬥戲份。問有否互相廝殺、扯頭髮場口？她說：「咁又冇，我哋好斯文。（拍攝辛苦？）熱同多蚊囉，都OK！起碼唔使着古裝衫、戴頭套，已經好幸運喇！」問為何不見洪永城在片場？她笑言：「佢今早有到場，講佢畀兩個背囊我哋，同講解個任務就走咗喇！佢好輕鬆好着數呀！又唔使曬！到一到扮曬，其實我哋幫佢做晒啲嘢！」
文：影視組