區永權 陸浩明 衞志豪劇癮大發

6號坦言最恨請張曼玉來一起Jam歌。而見一班「有線幫」黃翠如、洪永城等都成功踩入劇界，6號和Michael大嘆要轉型，客串角色。Michael更想一嘗無綫少林寺般的拍劇訓練，Albert坦言恨與有份參演hit爆劇《大時代》的劉松仁合作。

至想追訪紅星

陸：講開我哋個新節目，我好想請張曼玉上嚟。記得2004年上北京做時裝店開幕，無端端一次過同佢做兩個專訪，亦係我唯一一次訪問佢，雖然佢近年好少做香港傳媒訪問，但原來佢好Nice、好緊貼香港嘅嘢。我哋節目有個環節係畀Albert唱歌彈結他，所以好想曼玉唱首歌畀我聽，佢嘅歌藝已經去到神級，簡直一聽難忘。我諗佢上內地歌唱比賽《我是歌手》唱《十年》實贏韓紅。

張曼玉	鍾楚紅	6號與衞志豪坦言由有線過檔無綫後，入屋度倍升，令二人時刻警惕等候機會。

區：我會彈影后級版本，帶有少少迷幻feel、放煙。其實同做戲一樣，佢唔會循規蹈矩，曼玉唱《甜蜜蜜》就係突破框框、脫離規矩，最記得佢第二次再唱時話：「上次啲人話我走音，今次我繼續會走音。」佢真係好大情大性。而我就想請鍾楚紅（紅姑），因為周日返教會都見到佢，佢好虔誠。加上好多人以前，都畀佢拍嘅雜誌封面意亂情迷過，算有少少公器私用，滿足好多人嘅集體回憶，我都唔驚老婆呷醋。

三人對拍劇工作甚感興趣，有意客串Chok爆、搞笑角色，向前輩偷師。	黎明	周潤發

衞：之前請咗莫文蔚嘞，我就仲想請舒淇、趙薇。因為我第一套電影《夕陽天使》就係同佢哋拍，趙薇到依家都記得叫我個角色名「小馬哥」。依家佢嘅「阿里影業」賺咗40幾億，已經去到神級，請到佢就真係開心！

葉德嫻	區永權笑言對任何主持工作（舌累）飯應，絕不介意做埋6號嗰份。	放大圖片

「有線幫」過無綫

陸：加入無綫後，發現同喺有線都幾大分別。拍完飲食節目《食平D》後，真正體會乜叫「入屋」。個節目出街一、兩個禮拜，估唔到回響咁犀利。以前做五至八年先儲到一定知名度，依家落樓買早餐、去街市個個都認得，好快就可以建立到個「入屋度」。最大唔同係原來好多人留意、畀comment，有好多讚你嘅人，亦都有好多批評嘅聲音，初初都唔慣，所以要慢慢去適應同接受。

衞：入屋就一定啦，入到嚟做嘢方式有分別，以前節目冇咁多類型、亦冇咁多backup，但無綫就有好多節目畀你嘗試。同埋做一件事有好多人會幫你、一齊去做。以前做嘢輕鬆啲，入到嚟又唔會覺得辛苦，反而令我哋更加積極，好似讀完書出嚟做嘢，喺呢個大家庭入面，個個都打醒十二分精神，好警惕隨時等機會，令我更加鞭策自己。

區：我就啱啱先起步都未有壓力，因為呢度完全唔同工作模式。好似之前受訓完準備上太空，依家上到去好似無重狀態，好興奮，可能過多幾年先識驚。不過，以前覺得自己係個娛樂圈嘅工作者，唔稱得上藝人，但嚟到無綫第一個參與嘅活動係食盆菜。見到3000幾個員工食盆菜，真係好震撼，會覺得我就像宇宙中一粒沙塵咁微小。以前在電視睇到嘅人依家咁近睇到，呢種轉變係入到嚟先感受到。

最深刻的星訪

陸：做娛樂節目咁多年，最深刻一定係訪問黎明，真係估佢唔到。有次做電影《無間道III》宣傳，同佢哋由台北坐車落台南，嗰時冇諗過同佢做訪問，點知一班媒體食緊飯時，佢突然走埋嚟問係咪想訪問。一Roll機佢話：「唔好扮精神啦，猜番鋪15、20先啦！」仲話記得我去南生圍訪問鱷魚，原來佢有睇我啲節目，又記得啲細節嘢。記得我問佢拍《七劍》有乜難忘，佢話見到好多「夕陽」。我問佢係咪成日日落拍嘢，佢話在好直嘅山坡見到好多隻羔羊。佢嘅說話係好難解讀，但好過癮，只要你同佢同一步伐、Channel就得。

衞：我就最難忘跟電影《臥虎藏龍》去奧斯卡訪問周潤發（發哥），當時第一次出外好緊張，英文又唔係好得。最感動係去做慶功宴，發哥落車經過都記得我哋，每方面好似新聞、藝人、記者佢都好上心去記住，喺我訪問嘅藝人中，佢係最好、最親切嘅一個。

區：我就最記得有人向葉德嫻（Deanie）介紹我係個「鹹濕仔」，因為我一年生兩個小朋友。事隔幾月後再見Deanie姐，佢仲識得叫我「鹹濕仔」，又笑話：「我記性好好，所以好記仇，你小心啲。」Deanie姐真係好風趣。

恨闖少林學戲

陸：我份人唔貪心，知道自己專長係主持、做綜藝節目，如果擺落去拍劇做簡單角色、搞搞笑笑都okay，但突然要我好認真做個外國畢業留學返嚟嘅醫生或律師，我都唔知觀眾接唔接受到。當然都有拍劇呢個目標，但我想做好主持呢個崗位先，希望以後啲劇叫我客串，唔好再叫我做司儀啦。我想試吓其他嘢，做乜都好啦，做賊都好，我要轉吓型。

衞：我嘅目標同你一樣，想做好主持呢個工作先。拍劇我都鍾意，因為好早之前我拍戲多，但一、兩部就收咗山，哈哈。我內裏都好想學做戲，同埋感受吓無綫嘅訓練，喺度拍劇好似少林寺咁，好密集式開工令人學到好多嘢、加快吸收。我最想同佘詩曼（阿佘）拍劇，我想做佢哥哥，想教育佢，講笑啫。

區：我好簡單，咁大間公司咁有制度，公司叫我拍劇、做主持乜都好，我（舌累）飯應。既然你哋唔做，我做晒所有主持、司儀角色囉。其實我都好想同劉松仁（松哥）拍劇，因為近排睇《大時代》真係好經典，同咁好戲嘅人合作，佢點你兩句都可以用一世。

後記：逼供攻略快、狠、盡

任娛樂主播逾十年的陸浩明、衞志豪和區永權，在新節目《娛樂3兄弟》中碌盡圈中人情卡，邀得重量級嘉賓包括蔡卓妍（阿Sa）、莫文蔚、吳君如等，接受「至狠、至盡、至啜核」的訪問，大爆秘聞！Albert說：「我哋搵15條問題任佢抽，要佢5秒內答，答唔到就要懲罰。」難怪一眾星級好友都人心惶惶，怕他們「亂咁問」。

文：黎寶倫　

攝：劉智源