周迅透高格調
早前，中港台影星雲集上海，競逐「上海電視節」及「上海電影節」多項殊榮獎項，當然亦不會少了一班女星爭妍鬥麗大比拼，戰場依然是眾星必會盛裝踏足的紅地氈。女星們均穿上心水戰衣迎戰，務求走在紅地氈上能夠搶盡風頭，贏盡讚賞。名模陳嘉容就大讚周迅所穿的白色透視大露背晚裝高貴性感，艷壓全場；而楊冪一身粉紅色晚裝打扮則散發少女味，很有公主feel。
周迅
非常之靚，佢一向知道自己嘅身形着咩好睇，件晚裝着得佢好纖瘦高挑，高貴優雅得嚟又帶少少性感，係高格調嘅性感，白色拖尾輕盈飄逸，透視大露背嘅設計好搶眼，襯埋水晶芝娃娃Clutch真係搶晒鏡，艷壓全場。
張梓琳 優雅簡約
大方得體，簡約優雅，盡顯佢高挑修長嘅身材，配呢對唔係太高踭嘅高踭鞋好襯佢嘅身高，成個感覺恰當舒服，髮型化妝同Accessories都好襯。
熊黛林 感覺老氣
成個感覺有啲老氣、密實，毫無特別亦無乜時尚感，同佢平日嘅性感高貴形象唔同，加埋佢嘅髮型化妝都好普通，呢身打扮行紅地氈一啲都唔sharp，好平庸，換番條露少少肉嘅晚裝會適合佢嘅style多啲。
柳岩 賣弄身材
感覺太賣弄身材，成個look一啲都唔高格調，着到佢又肥又矮，同埋佢個胸好墮，唔應該揀呢條裙，個cutting顯得佢個胸更墮；髮型化妝亦都顯得老氣。
楊冪 粉紅公主
好靚，雖然佢已經生咗BB，但佢着呢條粉紅色裙依然流露出少女況味，呢種長度嘅裙款近呢幾季好hit，佢配襯嘅鞋款都好特別，成個造型好有公主feel，髮型清爽，有新鮮感。
范冰冰 揀錯衫着
完全錯晒，揀錯衫着，成個look感覺好累贅，着得佢身形唔靚，唔高挑之餘仲顯得矮咗，換過件前短後長款式嘅晚裝，露番對腳出嚟會靚啲修長啲。
Profile
香港著名模特兒陳嘉容（Eunis），曾為各大國際品牌行時裝騷，在時裝界打滾多年，不論時裝的理論還是實戰都難不倒她，近年更為電視時裝節目擔任主持，化身stylist教人配襯衣着打扮。