王躍穎自爆拍拖 馬詩慧驚呼：邊位呀？
名模馬詩慧（Janet）在活動上大爆囝囝王躍穎（Kadin）因常玩手機搞到成績差。繼媽咪爆大鑊後，Kadin在受訪時都不輸蝕，自爆在家姐教導下成功追到女生並拍拖2次。Janet聞言即大驚，急反問Kadin係邊個女仔，搞到囝囝鬼咁尷尬，即時面紅耳熱。
名模馬詩慧（Janet）昨午以大使身份出席戒毒基金會活動，更帶同15歲兒子王躍穎（Kadin）亮相。兩母子在台上交流時，Janet不停爆囝囝私生活。問到Kadin做過最壞的事情時，Kadin坦言：「都只是成績差，不過依家成績都冇乜點變。」在旁的Janet不禁加口話囝囝：「因為你成日都望住個電話，睇住咩人搵你。」
家姐教冧女攻略
對於爆囝囝秘密會否令對方尷尬，Janet坦言不需要尷尬，更笑稱平時對囝囝管教並不嚴厲：「我成日都同佢講嘢，不過佢只會同家姐講秘密，請教家姐點追女仔。」在旁的Kadin雖一臉尷尬，但亦直認家姐教追女仔的方法work：「都追過幾次，幾次都okay。」Janet聞言驚問：「咩叫okay？」Kadin尷尬謂：「追過都成功，拍過2次，上年的事。」Janet急再追問：「邊位呀？」囝囝即時嚇得臉都紅晒，不知所措。
一拖幾件朋友仔
其後，Janet表示見過Kadin的女仔朋友：「佢通常一拖幾件，不過係朋友，我覺得佢話拍拖是另一回事，可能佢覺得單獨出街就係拍拖，依個係我所理解。」Kadin只好笑晒口話同意Janet說法，並表示從來沒有帶女朋友返屋企。
文：名人組