黃宗澤「親熱」戲屁股遭殃
頻頻於內地掘金的黃宗澤近日返港忙為新劇開工，他爆料同劇的黃浩然將與小花朱千雪有親熱戲，大呼羨慕；相反他卻要與狗仔「親熱」，屁股當災。
無綫小生黃宗澤（Bosco）日前與黃浩然現身旺角為新劇《警犬巴打》拍攝，在炎炎夏日身穿牛仔褸開工，甫落車已難敵高溫，除衫兼出動私家風扇仔降溫。
Bosco將在新劇與鍾嘉欣飾演情侶，透露將有搞笑的親熱戲份，他笑謂：「情侶間錫吓嘴仔必定有。（會有床戲？）暫時未見到。（期待親熱戲？）觀眾期待啫，我哋都係做嘢。」Bosco更爆浩然將與朱千雪有不少肉搏場面，相當激烈！他說：「佢哋咀戲同床戲乜都有！（羨慕？）都唔知係咪浩然畀咗錢編劇，咁益佢！」而他將與警犬有不少對手戲，更會遭狗仔咬屁股。
想同新人合作
談到胡杏兒及吳卓羲等約滿後不續約，無綫力捧陳凱琳、朱千雪等做生力軍，Bosco說：「梗係要啦！唔通叫我演啲21歲嘅偶像咩，當然要不斷有新人出現。（想同新演員合作？）都希望有新火花，千雪咁啱都喺套劇做我個妹。」
文：影視組