連詩雅負傷跑半馬
歌手連詩雅（Shiga）前晚聯同馮允謙、方皓玟及C AllStar舉行音樂會，Shiga與C AllStar出場時粉絲反應熱烈，她大感高興及安心：「初時好驚，好耐冇做呢騷，之前都喺大陸同外地多，好耐冇一次過唱五首。」日前剛過27歲生日的她表示最希望舉辦演唱會，更有意置業，讓母親早點退休享福。
Shiga亦想挑戰半馬拉松賽事，但有點擔心：「我腳骨弱，膝頭唔好，成日要睇跌打、做物理治療。（唔怕跑完仲傷？）少少啦，點都跑完21k（半馬）先，醫生話要抖先算。」積極練跑的Shiga之前到美國工作，未能與其夜跑隊「My Girls」隊友練跑，但仍每日獨自練習，連生日正日也跑步。