關之琳誕first baby 陳泰銘甜蜜撐場
大美人關之琳（之之）有份投資的美容品牌出盡人情牌，連甚少公開露面的台灣富商男友陳泰銘亦現身撐場，「之之」開心分享護膚心得時，指有愛情滋潤皮膚自然好，還說想拍寫真留倩影。
關之琳昨晚的自家美容品牌RK舉行晚宴，身穿tube dress大騷香肩，春風滿臉的她一早到場招呼朋友，表示品牌是以她的英文名字Rosamund Kwan（RK）為名，是她的first baby，但不願透露投資數字。
有愛情可防腐
問「之之」用了是否似她漂亮？她開心地說：「仲使講嘅！（有冇介紹畀你『未婚夫』用？）男士當然都可以搽。（訂咗婚啦？）你哋咁問我咪咁答。（防腐心得是否要有愛情滋潤？）最好啦，冇都要搽面搽身。」她還說想出寫真留念，已有攝影方向：「係相集加手寫字句嗰啲，我好慢動作，希望兩年內出啦，想影啲感性同生活化啲嘅相。」
訪問完後，陳泰銘突然現身活動，但只願隔着朋友與「之之」合照，不過他的視線依然離不開「之之」，認真甜到漏，低調的陳泰銘影完相後，火速進入會場！
Niki懶理嘉穎
出席的嘉賓還有周麗淇（Niki）、名媛毛玉萍、呂良偉太太楊小娟、周國豐伉儷、劉娟娟、金燕玲等，Niki被問到舊愛鄭嘉穎與陳凱琳的戀情，她表示毫不知情也沒有留意：「人哋私人嘢唔回應。（覺唔覺佢哋年紀差距太大？）鍾意咪得。（祝福佢？）佢哋開心咪得。（比起同你拍拖時，嘉穎依家好高調？）上世紀啦，冇乜比較。（會唔會快過佢結婚生仔？）冇得鬥快嘅，我一向都冇壓力，我都係一貫自己低調嘅作風，開心就得。」楊小娟透露老公呂良偉在武漢拍戲，下月會去探班，兒子將去美國西點軍校軍訓一個月。
文：名人組