學友等睇囡囡戴四方帽
歌神張學友昨日獲香港演藝學院頒授「榮譽院士」，得獎無數的學友，首次穿院士袍攞獎緊張得面容繃緊，笑言待再獲「榮譽博士」才請家人捧場，現最期待反而是看女兒畢業戴上「四方帽」。
現年53歲的學友穿上紫色銀帶的院士袍出席演藝學院「榮譽博士暨榮譽院士頒授典禮」，由電影電視學院院長舒琪為學友誦讀讚詞，細訴入行31年的卓越成就及宣布獲榮譽院士，但就未見學友太太羅美薇及兩位愛女撐場，而唱片公司高層黃劍濤有到賀。
屋企食飯慶祝
頒獎禮後學友接受訪問，見他台上表情嚴肅是否很緊張？學友笑言：「可能係排第一個，程序時間要準確，又記住啲走位啦！（唔見老婆同兩個女？）等我攞博士先啦，今晚冇特別慶祝都係喺屋企食吓飯，咁太太都有恭喜我。（真係等攞博士先請？）講笑啫，都唔知有冇機會。」
問到穿上院士袍感覺？學友坦言：「叫做着過啦，冇諗住着到，我呢啲讀書差嘅，如果讀書叻嘅人好快着到，以我嘅年紀應該攞到博士，咁當然依家都開心，係個榮譽嚟。（最期待係個女着畢業袍？）當然啦，雖然我着佢唔在場，但佢着我一定在場。（會感動流淚？）呢啲係發自內心，咁早講定就怪怪地，但我都期待嘅，快㗎喇等多幾年。」
金曲獎預咗坐
至於可會出席台灣的金曲獎頒獎禮？學友稱如檔期可以都出席；而同樣有份角逐男歌手獎的陳奕迅表示睇好學友攞獎？學友坦言沒有期待：「過得去係預咗坐，因評審團都係嗰班，唔會突然轉咗睇法。」
文：音樂組