吳啟華年齡無拘 歡迎思貝發電
與相距21歲的前妻離婚的吳啟華，昨日偕李施嬅、蔡思貝等為新劇試造型，面對比他年輕27歲的「發電廠」蔡思貝，他笑言鍾意女仔多電力，更無懼被傳「父女戀」，又恭喜蜜運中的陳凱琳與鄭嘉穎，力撐愛情無年齡界限。
藝人吳啟華、李施嬅（原名：李詩韻）、黎諾懿等，昨日出席無綫新劇《純熟意外》造型記招。劇中啟華將與施嬅、蔡思貝有感情線，對被指女拍檔愈趨年輕，去年跟相距21歲的石洋子離婚的他笑謂：「咩年齡嘅男人都鍾意啲廿幾歲嘅，觀眾都一樣鍾意睇啲後生靚女，男人襟老啲，好似我睇唔出年紀咁大。（接受後生女？）我梗接受啦，點會唔鍾意後生靚女！」
談到緋聞纏身的思貝獲封「發電廠」，啟華笑稱：「我最鍾意女仔多電力。」提到陳凱琳與鄭嘉穎的「父女戀」，作為「先驅」的他即恭喜兩人，問到怕跟思貝傳「父女戀」嗎？他說：「唔怕，不嬲都父女戀開，之前嗰個都差21年，年齡唔係問題，最重要係兩個人夾到，但我好少鍾意劇中拍檔，要公私分明。」他又透露早前返內地與女兒食飯預祝父親節，稍後則與前妻、囡囡及其外婆去沖繩，愛女又將在長春返學。
李施嬅「鄙視」黎諾懿
於新劇一人分飾三角的施嬅，直言讀書時追看劇集《倚天屠龍記》，如今能跟兒時偶像合作好興奮，又透露與相識多年的好友諾懿有親熱戲，她笑道：「我唔想同佢拍親熱戲，有啲尷尬，咁friend好怪。監製話可能有床戲，我第一個反應話『吓？』監製話我鄙視佢，我話佢好高大靚仔，但我哋太熟喇。」對於日前獲汪明荃大讚演技，施嬅坦言有點感壓力，望努力拍好戲，免令前輩失望。
文：影視組