泳兒不一樣風情 卿卿激讚
尋求突破的泳兒大膽翻唱一代性感女神葉玉卿（卿卿）的首本名曲，身在美國的卿卿大讚她的性感演繹近乎滿分。泳兒獲得前輩的高評價，受寵若驚，希望可以在昔日女神面前親身演繹一次，更想對方再給她過兩招。
英皇歌手泳兒最近翻唱葉玉卿的代表作《擋不住的風情》，為歌曲特別染了一頭金髮的她，在MV中穿上貼身黑色舞衣又扭又擰，有歌迷大讚她成功性感演繹那種風情萬種感覺，別樹一格，不過都有網民不欣賞，批評她唱不出風騷入骨的味道，嫌她不夠姣，可謂好壞參半。
把聲夠嗲畀95分
身在美國紐約的卿卿作評判，給泳兒打了95分，大讚她的演繹幾乎滿分，卿卿說：「啱啱聽咗又睇咗泳兒翻唱《擋不住的風情》，我自己就好鍾意囉，睇完一次好深刻，因為佢把聲好嗲，有自己一套唱法，佢嘅造型、舞蹈配合得好好。」卿卿很佩服泳兒，因為翻唱別人的歌是很難的，要有好有信心不怕比較先做到。
有壓力打強心針
泳兒獲悉卿卿對自己讚賞感到受寵若驚，她說：「冇諗過佢會睇到呢個MV，仲畀好高評價我，我好開心，對我係極大鼓勵，一支強心針。」泳兒承認翻唱卿卿的首本名曲壓力很大，她說：「預咗出街有人鍾意有人唔鍾意，我唱呢首歌唔係諗住話要挑機，我係覺得呢首歌好好，無論旋律或者音樂上都有好大發揮空間，喺畫面上好多嘢可以玩，今次做呢隻歌做得好開心，好榮幸可以唱。」泳兒希望有機會親自向卿卿答謝，更想邀對方來看她的live show演出，她說：「我可以現場跳一次呢一隻我嘅版本畀佢睇，咁佢可以再過兩招畀我。」
文：音樂組