Heidi行山怕變象腿 發哥：我嫌腳瓜太瘦
第十二集《我愛發哥》昨日在《東網巨星》App播出，女子組合Super Girls的Heidi（李靜儀）搞笑問男神周潤發會否驚行到腳粗，又叫他騷腹肌，發哥即搞笑回應，自嘲腳瓜唔夠硬兼一肚豬腩肉，仍要努力操弗！
Heidi：「我鍾意發哥和藹可親，有一次行街撞到佢，我望住佢，佢笑住望番我，冇刻意遮住自己，好光明正大咁行街，見到途人搵佢影相都一一應承，好後悔當時冇搵佢影，下次見到一定要捉住佢合照！」
發哥：「你真係客氣，大家都係自己人，都係香港人，有身份證同我都影得相o架！驚咩？我又唔會食咗你！真係！」
Heidi：「你成日行山驚唔驚行到腳粗，會唔會做番拉筋運動？」
發哥：「我就係嫌我腳瓜啷瘦過頭，冇咩力呀！我打一下揈十幾嘢，我要整到好實，所以日日都要行，同埋行好多樓梯，咁先整到佢實呀！你等我，唔係好耐，一年半載應該得，依家打落去，揈少咗，九次度啦！如果我第日打落去『框框聲』，我就會識喺山度飛！」
全黑為遮醜
Heidi：「行山咁熱，發哥你有冇試過熱到除衫騷你嗰排有型『朱古力』呢？」
發哥：「嚇死人咩！我仲有個腩o架，我個豬腩仔都唔細o架！你未見過咋，所以我成日着黑，啱o架！點解呢，一係吸熱，吸熱後出多啲汗；第二，黑可以遮三醜。我呢啲上面塌晒，好似洗衫板咁，下面就豬腩肉，邊見得人呀！好似你咩？Super Girl！
聽到發哥高呼「Super Girl」，Heidi即一臉難以置信，興奮到不斷重複：發哥講咗Super Girls呀！好開心呀！佢話我哋係自己人呀！同埋佢最尾答完我啲問題之後，佢就話Super Girls！所以發哥知道有Super Girls，佢識得我哋，由依家開始，佢會知道有Super Girls嘅存在啦！好開心呀！
文：陳偉立
採：羅宛君