鄧麗欣闖韓疫地：會不停洗手
南韓的「新沙士」疫情繼續嚴峻，直至昨晚已有25人確診，更有兩宗死亡病例及蔓延之勢，全球人士都對此密切關注。偏偏太陽娛樂揸弗人黃柏高（Paco）聯同旗下歌手鄧麗欣（Stephy）及組合As One無懼疫情，繼續前往及留守首爾工作，令粉絲提心吊膽，遠在內地工作的方力申更越洋勒令女友Stephy：「洗手！洗手！洗手！」Stephy也乖乖聽話，表示會密密洗手！
席捲南韓的「新沙士」（中東呼吸綜合症）疫情不斷擴散，直至昨晚當地已經有25個確診病例，更有兩宗死亡個案，情況令人擔心。
首爾向來屬港人熱門旅遊地點，自疫情爆發後令不少計劃前往當地的人都紛紛打退堂鼓，但偏偏鄧麗欣繼續前往當地，昨早Stephy在微博上載在機艙的自拍照，表示要往疫區工作，嚇得粉絲叮囑她要保重身體。原來除Stephy外，公司揸弗人Paco及同門組合As One眾成員都同樣身在韓國工作，其中As One因在當地受訓，已逗留在首爾好一陣子。
方力申勒令小心
今次到首爾拍攝nowTV旅遊節目《Fashion Seoul大激戰》的Stephy稱，早於出發前已知道當地疫情嚴重，她說：「我已經做足安全措施，帶晒口罩、消毒噴霧、洗手液同濕紙巾，同埋會不停洗手保持清潔。」已身處當地的她會逗留約四至五日，提到當地情況，她說：「反而見到當地人唔係太緊張，街上都冇人戴口罩。」
而Stephy男友方力申身處成都拍戲，對於女友闖疫區，小方接受電話訪問時勒令女友：「要小心啲，記得戴口罩同埋洗手！洗手！洗手！」同時他又叫女友毋須太擔心，只要留意當地政府的公布：「總之做好個人衞生，當地政府冇講其他即係仲安全，唔使太敏感。」
至於同樣身在疫區的太陽娛樂揸弗人Paco在當地為電影《殺破狼II》洽談發行，他受訪時表示當地氣氛大致平靜，沒半點緊張：「入境時，成個海關只得收健康申報表嗰個海關戴口罩，喺市區就冇，我自己唔擔心。（點預防？）飲多啲酒囉。」而早在當地受訓的As One，成員Nata亦向記者報平安：「我哋喺呢邊都有留意住新聞，知道疫情日日都有增加，但我哋每日訓練時間好緊密，冇咩機會接觸到其他人，總之保持住身體健康就唔太擔心。」
C君家人受影響
而組合農夫昨日在電台談到「新沙士」來勢洶洶，成員C君透露家人亦受影響：「我屋企人住喺伊利莎伯大廈，之前諗住返屋企探嫲嫲，但發現樓下全部都係港聞記者，於是打電話返屋企問吓先知，原來大廈有未確診個案，仲叫我唔好返去住。」C君慶幸嫲嫲還有其他家人照顧，令他不致心掛掛和太憂心。
文：音樂組