李治廷睇透范冰冰：佢內心係公主

自揭與冰冰關係

李治廷與人稱「范爺」的范冰冰，因合拍電影《一夜驚喜》傳緋聞，直至拍《武則天》時冰冰傳與內地男星李晨撻着……

做得呢行冇得討厭緋聞，討厭就唔好做呢行，日日打開手機、報紙雜誌都係，我都唔理呢啲新聞，自己心裏面最清楚自己做緊咩。拍劇時，我都唔會八卦人哋嘅緋聞，男人老狗咁八卦做乜，仲要拍緊戲喎，唔驚導演鬧咩，做好該做嘅事先啦。

性格洋化的李治廷，為了新劇特地學習中文及中國歷史。	李治廷在劇集《武則天》內扮演皇帝，更演到58歲。	靚女自然多人追，范冰冰近年來緋聞不絕，但未有一段公開承認的關係。

至於冰冰係我好珍惜、好親嘅朋友，佢開心我都好為佢開心，佢係非常專業嘅女演員，佢嗰份意志力超乎常人想像，佢可以堅持每日為套戲去諗百般方法提升質量，每個細節都自己去打理，我覺得呢個好難得，仲要持續八個月。以我嘅理解，「范爺」係佢工作上嘅能力而得到嘅稱號，戲外佢同我哋班演員相處都唔係好女漢子，係正常女仔一個，我覺得每個女仔無論點女漢子、女強人都好，內心都住咗個八歲嘅公主，我身邊好多所謂女漢子，都好明顯有個八歲嘅公主。

恨做現實癡情男

李治廷在《武》劇中飾演「唐高宗」李治，為「武媚娘」范冰冰最終走上王權之路，不爭權的他更是「愛美人不要江山」。現實中，李治廷也希望成為「李治」這種癡情男……

如果適合嘅時候或遇到適合嘅對象，我都不妨有機會會公開，隨緣啦。暫時我冇欲望同大家分享生活嘅呢一部分，畢竟演員同公眾人物係分唔開，我哋已經好多私生活願意定唔願意都會被曝光，我希望感情部分可以自己去保護同低調啲。依家會以事業為重，當然有適合緣分都唔排除，遇到啱嘅人唔容易。

努力過不後悔

我覺得緣分唔係成日碰到，遇到啱嘅人要努力去維持關係，去愛護你嘅女人，最終係點唔緊要，大家努力過就唔後悔。「李治」係我見過最癡情嘅男人，一生人為武媚娘奮鬥，做皇帝為咗保護武媚娘，為了有權力得到對方。我都好希望可以成為「李治」咁嘅男人，我覺得佢好偉大，當時啲人好似冇咁自我中心，好似無私啲，顧嘅係國家、家庭、下一代，佢哋會為國捐軀，呢種精神好值得學習。

為拍戲唔怕捱苦

參演過《李小龍》、《歲月神偷》等電影的李治廷首次拍攝古裝劇，他指最困難是身體負荷到極點時還要繼續拍，但直言喜歡演戲也從不計較辛苦，更希望再次挑戰動作片。

最記得有場要穿上近40磅嘅戲服，當時橫店40度左右，成頭汗滴緊，仲要一路行上樓梯一路講對白，然後long track行到頂講對白，第一take我行到頂望住冰冰，喘晒氣講唔到嘢，完全適應唔到，但我又冇嚇怕，反而明白到做演員係應該咁辛苦，係我之前太幸福，如果再拍要我操到行二百級（樓梯）都無問題。

想拍動作片

雖然拍劇挑戰大啲，但同拍電影唔同，鍾意表演嘅人兩樣都想拍，下一部都係睇劇本、角色去選擇。我就想拍動作片，之前拍電影《李小龍》唔夠喉，我覺得動作可以表達到好多文戲表達唔到嘅台詞、情緒。當然我都唔怕捱，如果想做一樣嘢做到最好，一定會好艱難；如果要做到世界嘅top，你要付出無窮努力，所以要演到劉青雲嘅級數，對於我呢種演員要付出好多好多，先可能理解到佢嘅世界係點。我希望有日演到喺銀幕睇唔到自己嘅影子，觀眾都覺得唔係李治廷！

扮皇帝開心嗌爽

曾於英國留學多年的李治廷，對中國歷史認知可謂「有限公司」，於《武》劇的角色更由16歲演到58歲，他更自爆開工首日緊張到震，單是背中文對白已是一大挑戰。

第一次演古裝、電視劇好大壓力，節奏快過電影好多，因為有幾千場戲，好似活咗一個人生，嗰幾個月好似活咗好多年，有時空穿越嘅感覺。我覺得演58歲難啲，因為16歲自己活過，有得參考，演58歲就惟有不斷觀察、想像。呢個角色係我功課做得最足、最盡、最徹底一次，四十幾集原劇本，我本身六、七個鐘先睇到一集，因為好長、中文好難；殺青前，我由頭到尾睇過三、四次，將角色重大事件列晒出嚟。我本身唔識呢個歷史，拍攝前都睇番書、搵老師幫，有學番少少中國歷史，了解番當時嘅大環境、人物關係，每日上八至十個鐘台詞課，準備咗個半至兩個月左右。

努力獲導演認同

呢部戲每個演員都令我學習非常多，今次當自己學生抱住學習心態，全部都係老師級、資深嘅演員，導演就係校長，日日希望唔會畀校長罰，好在都冇畀佢話過，最開心有日導演讚我進步好多，叫我繼續努力，嗰刻好安樂，覺得一定要好好演繹「李治」呢個角色。其實演皇帝真係好正、好爽，依家出街都畀人叫陛下、皇上，幾鬼開心。

曾獲最佳新演員

歌手出身的李治廷近年踩入影視圈，靚仔有型的他也並非得個殼，他在2010年憑電影《歲月神偷》榮獲「最佳新演員獎」，今次拍《武則天》更力求完美，費盡心思學好中國歷史。見他受訪時，單是拍硬照也不時要求查看，甚至主動換衫去配合，工作態度一絲不苟。

採訪：黎寶倫

攝影：秦健輝

場地：港島香格里拉大酒店

服裝：Ports1961

化妝：Bill Chan@A&V Makeup School