朱千雪認攰唔認驚 槍戰口震震

首度做女主角的朱千雪，連場動作場面，與袁偉豪互相照顧。

朱千雪及袁偉豪昨日到元朗拍攝無綫新劇《EU超時任務》，飾演衝鋒隊警員的千雪激烈槍戰，捉拿演大賊的王俊棠。二人於開槍後接受訪問，記者問到朱千雪為何講嘢口震震，她則否認受驚指：「係好攰，做動作演員好辛苦。我第一次對住目標開槍，之前都係就鏡頭。劇中仲有飛車、反車、槍戰，之前拍我踢動作演員落車，幾好玩。（首次做女主角畀足心機拍？）我部部都畀心機，我唔怕拍打戲，飛車都OK，但反車可能要專業人士做番。」

• 朱千雪孖袁偉豪上演激烈槍戰捉賊。

袁偉豪受傷頂硬上

袁偉豪則撐千雪不是弱質女流，他說：「佢唔係『論盡』底，我之前拍《飛虎》都揸過槍，但呢次開shotgun都覺得好震撼！（唔怕受傷？）尋日拍場追逐戲，整到少少左膝，之前開槍又撞親下巴，但好小事啫。（危險鏡頭都親身拍？）睇情況，有危險會交畀武指，其他自己做，保護措施要做足，萬一傷咗開唔到工，影響到大家。（動作戲會睇住朱千雪？）互相照顧啦！」

文：影視組