林德信攬腰未夠喉恨咀心悠
藝人林德信（Alex）及劉心悠日前於觀塘拍攝電影，期間與日模松岡李那日漸戀情浮面的Alex未怕對方扭耳仔，於現場扶實心悠纖腰及肉緊捉手仔。他更自爆期待與心悠咀嘴：「戲中有場goodnight kiss，目的係示威！」
林德信（Alex）及劉心悠日前於觀塘拍攝電影《我老婆係明星》，化身「高富帥」的Alex就把日模女友松岡李那「拋諸腦後」，實行火力全開地力追心悠！期間未怕女友呷醋「扭耳仔」的他，不但出動辣跑接載腳步浮浮的心悠歸家，更伸手扶實對方的小蠻腰及肉緊捉手仔，相當大膽！
爭女靠好廚藝
Alex於受訪時自爆使出「追女必殺技」與周柏豪爭女：「我唔知戲中心悠同柏豪結咗婚，所以全力追佢！（現實有冇爭女經驗？）要爭o架，呢個世界咩都要爭！（必殺技？）整嘢食！」問他與心悠有否親熱戲份？Alex即爆笑指嫌少：「冇乜喎，揼心口呀！（主動要求導演加戲？）其實戲中有場goodnight kiss，好期待呀！（唔怕女友呷醋？）咁做目的都係（向柏豪）示威！」而擁有煞食笑容的Alex於戲外就大受現場小朋友歡迎。他們更一度突破工作人員的「防線」，搞笑衝到Alex面前大讚他「好靚仔」，獲得冧爆的Alex摸頭致謝。
心悠唔吼靚仔
其後心悠就於電話訪問中笑言現實中唔吼「高富帥」：「戲入面Alex有次送我返屋企，就錫我額頭表白，幾sweet！（現實曾否被呢種高富帥追求？）以前喺加拿大讀書時，都係啲puppy love！而我入行後就冇拍拖，感情生活零！（鍾情咩男仔？）我唔喜歡靚仔，比較鍾意有內涵同有思想嘅男仔，內在美仲吸引過外表。」
文：影視組