DaDa AnnieG.喪癲閨蜜

D：DaDa Lo A：Annie G

同住整蠱易惹禍

D：初初我同A.Lin熟啲，之後因為同你都好爛玩，一齊去飲嘢、去賭場先熟咗。好奇怪，你每搬去一個地方，我就會搬去你隔籬，或者搬去你對面嗰棟，到你第三次搬新屋，我又咁啱租約完咗，跟住就直頭搬去同你住。

A：我就覺得有啲恐怖囉，可能係緣分嘅問題啦，點會次次都咁啱搵到附近有屋租？

D：作為室友，你算okay啦。之前做嘢都成日同你出trip，又試過去你屋企瞓梳化，做咗「廳長」一個月，都慣咗大家嘅生活。依家一齊住都係當旅行咁，我同你不嬲都唔多拗撬，淨係互寸吓咁囉。

A：有次你超衰囉，send咗我張相去好多人嘅公司group裏面，我瞓醒就見到個group好多message，一開嚟睇發現係我冇化妝、戴住副眼鏡、個頭勁亂咁同你、A.Lin視像嘅Cap圖，嗰次我嬲到完全唔聽你電話。

有西班牙血統的Annie G.，笑言成日被DaDa鬧肥，令她更有推動力做gym。	DaDa表示與好友同住，最好係有人陪傾偈分擔工作上壓力。	Annie G.（右二）常孖姐姐（左）與好友夜蒲。

D：你係嬲咗我成個幾禮拜呀，我仲send message問你有乜好嬲？我都唔明點解要嬲，不過之後要出活動，見面前都同你解決咗。

各有怪癖鬥烏歪

D：家姐最頂唔順我哋將啲用完嘅con盒周圍擺，多數都係佢喺屋企執手尾。佢係阿媽嘅角色，捉得我哋好緊。不過，我哋成日喺屋企拍片，互相整蠱大家，有時會喺廁所等人出嚟嚇佢，互相拍低大家嘅核突片，哈哈。一齊住最好係可以飲到好醉，跟住發癲玩白癡遊戲，例如「真心話大冒險」，飲少少酒扮猩猩拍片，好搞笑。

A：我都未有機會向你報復，啲片喺晒家姐度，佢唔畀我哋拍，因為佢唔想畀人放上網，但你有好多衰相喺我度，啱啱瞓醒三、四個下巴嗰啲樣。我哋出trip都有影好激嘅相，最激係着「海綿寶寶」底褲、背心跳梳化。

D：我覺得你兩姊妹最怪係要蓋上馬桶蓋，勁驚有菌咁。

A：你夠唔鍾意着衫周圍走啦！最有趣係你隻狗好鍾意摷垃圾，記得有次家姐喺group度send咗幅相，係條用過嘅衞生巾擺咗喺梳化度，佢問係你定隻狗擺喺度，家姐嗰時好嬲、勁想鬧你，但我就覺得好好笑囉。

肉帛相見大便樣

D：我覺得同朋友一齊住幾好，一行出房門就有人聽我講嘢，可以成日同你傾無聊嘢傾到凌晨，講吓感情嘢、上網睇靚仔。我哋都好少呻，多數都係討論，通常講工作嘅嘢多啲，好似返屋企同家人講咁，你都畀到好多意見我，可能大家年紀差唔多又同行，有時會三個人投票決定。

A：但好多時都係我自己決定囉，哈哈。不過我覺得起碼有個人聽、畀反應，好過有時自己一個唔開心。最好係同其他人講會唔明，但你就會明，因為我哋同公司，互相了解大家嘅環境、鍾意同唔鍾意啲乜，所以你會明白我嘅感受。

D：記唔記得有次大家返房瞓，我電話到六點幾，之後喺group度send message問你哋瞓咗未？結果三個都話未瞓就一齊出廳食嘢。有時喺屋企都會打電話，互相叫大家起身開工，都幾搞笑。某程度上，同你哋仲close過我男友，喺男友面前都唔會大便，但我哋同A-Lin出trip時，喺廁所一個刷牙、一個沖涼、一個落妝，大家都肉帛相見。

A：但你成日話我肥囉，又鬧我「再肥啲吖笨」，呢樣最衰！不過我自己都想減肥，依家有時都會約你做gym，一齊做感覺有推動力啲。

後記：互踩當激勵

受訪期間，兩位孖妹不時鬥嘴互寸，看得出二人感情深厚。原來擁西班牙血統的Annie G.，常與家姐以西班牙文溝通，更笑言即使講DaDa壞話都聽唔明，不過DaDa卻表示已學識西班牙文，死撐靠其有限的西班牙文，再睇埋肢體動作都略明一二，相當搞笑。

文：黎寶倫

攝：張福宏

場地：Le Paradis Restaurant & Cafe（尖沙咀）