張建聲傷心獄絕困到癲 莊思敏生日嗌陰公

男星張建聲為宣傳新片《壹獄壹世界》，前日不惜親身上陣示範「監躉」生活，在穿梭於旺角與銅鑼灣之間的特製流動「水飯房」專車中「踎監」示眾，經歷72小時苦悶的入冊生活。

從前日起「入冊」被禁足於不設娛樂設施的「囚車」的張建聲，至昨午4時已「踎監」達26小時，他向直播其動向的錄影機大吐苦水說：「個人係會困到癲，我都叫好啦，有啲嘢望吓，如果真嘅話，20個鐘頭已經黐咗線，崩咗潰。尋晚唔係好瞓到，今日好麻麻哋，實在難以形容。」有不少網民透過直播追蹤張建聲，當「放風」截斷直播時，網民們即大呼「走犯」，相當搞笑！

冇牆猶如瞓街

同公司的莊思敏、唐貝詩與老闆蕭定一昨午到場，見到熟人的張建聲才稍稍回復精神，他更有如「監躉」獲探監一樣，大呻「入冊」期間的遭遇：「好鬼辛苦，第一時間長，第二係好多街坊friendly，但周圍冇牆，好似瞓喺條街度好唔自然。最驚瞓覺，一扎醒瞓喺條街度，嚇到我吖，勁驚，我出返去會好好做人o架喇。」適逢莊思敏於5月1日生日，電影公司特別準備生日蛋糕供張建聲為她補祝生日，莊思敏見他一臉落魄，大呼不捨：「一個人喺度係好無奈，比着我15分鐘已經發癲，因為冇電話，現今呢個世代最難過就係冇電話。」直至截稿前，張建聲於「水飯房」被拍得神情呆滯，來回踱步。

文：影視組