許志安被催生 按穴位壯陽

許志安前晚在紅館為其《Come On 2015》演唱會進行第二場演出，延續首場的精彩表現。而嘉賓方面則找來好兄弟梁漢文（Edmond）、蘇永康和張衞健（Dicky）組成BIG FOUR，向觀眾大放笑彈。其中兄弟們為賀安仔新婚，紛紛為他出謀獻計望他早日榮升爸爸。

合唱齊感觸落淚

其中Dicky甫現身就問安仔：「你最愛光脫脫？定瘦蜢蜢呢？」然後又指安仔：「我上咗嚟咁耐，點解你都唔介紹吓我嘅？」正當安仔想開口時，Dicky即打斷他：「你認為有咁嘅需要咩？邊個唔識得我？你係咪畀人灌你迷湯，定減肥減到傻咗？」立即全場爆笑。

然後Dicky又自稱叫「老奉」，他說：「次次你開騷我就老奉要嚟，老奉要講好多嘢同老奉冇錢收。」然後又質問安仔：「你刮埋刮埋咁多錢做咩？儲奶粉錢呀？呢個世界有人奶o架。」無力還擊的安仔不停點頭乖乖受教，同時台下即報以熱烈的歡呼聲，到兩人合唱《明星》時，一同都感觸落淚，場面感人。

撳咗許太唔得閒

其後Edmond和蘇康一同上台，Dicky此時即指着台上安仔的大型頭像布景向兩人說：「入屋叫人，入廟拜神，見到咁大個『許大仙』都唔拜吓。」然後三人齊向安仔的頭像鞠躬，蘇康指着頭像下方笑說：「呢個湧泉穴壯陽o架，撳咗許太今晚好唔得閒。」在旁的安仔繼續在傻笑，但台下就以更為熱烈的掌聲和應。

另外，前晚演出時亦發生過一段小插曲，蘇康原定演唱《那誰》時，在升降台出場與安仔對唱時，但咪高峰卻突然失靈，要等工作人員換咪，其後觀眾大叫Encore，蘇康就向安仔說：「咁返落去再唱多次。」又叫觀眾：「你哋Keep住個情緒。」獲全場掌聲鼓勵。

文：音樂組