嘉穎凱琳異鄉溫馨回港避忌

鄭嘉穎與無綫新一代女神陳凱琳因拍劇暗生情愫，二人早前跟隨劇組到荷蘭取外景，離開香港這監管嚴密之地，於當地續寫戀曲，收工返酒店更約會開餐，不過二人昨返港即變避忌前後腳走，男方更黑面示人。

鄭嘉穎早前因拍無綫新劇《殭》與陳凱琳（Grace）火速撻着，更曾被《好報》影到Grace直上嘉穎住所短聚，事後二人亦夾晒口供暗示不無發展空間。日前二人隨《殭》劇齊齊到荷蘭拍外景，趁機離開香港這嚴密監管之地，於異地續寫愛情戀歌，就算監製陳維冠因時間緊迫要於當地開兩線拍攝而令二人見面機會甚少，但都無礙二人談情，反而令二人更珍惜短聚時刻。

出閘一言不發

不過，放下戒心的嘉穎與Grace在昨日隨大隊飛返港時卻即時變得避忌，兩人前後腳出閘，昨日一臉倦容的嘉穎出閘時只與同劇的陸永為伴，一見記者就加快步伐一言不發全無笑容，顯然不想回應記者的問題，對記者戒心甚高更黑面離開。而Grace則成功逃脫避開記者耳目，事後通電才得知她已被胞弟送返家。問她分開走是否要避開與鄭嘉穎同場？她說：「各人都有各自嘅方法返屋企o架嘛！（同嘉穎喺荷蘭朝夕相對？）唔係呀，喺荷蘭拍攝分開咗兩個team，我主要係同陳嘉寶嗰邊一齊拍，（咁咪好少見囉？）有幾場同場囉，同埋收工返到酒店都會一齊食飯，（佢特別照顧你？）見到面都係普通朋友傾偈啫！好正常！」