洪永城冇畀李佳芯姣掂
無綫藝人洪永城（Tony）及李佳芯（Ali）昨日為新劇拍攝外景，早已公開宣稱對唐詩詠有好感的Tony，雖力撐Ali不是姣精，又謂不覺Ali姣他，但不用埋位時即與對方保持距離，努力栽培與詩詠的愛情幼苗。
洪永城、李佳芯、陳慧珊、黃智賢、李子雄等，昨日到西貢為劇集《波士早晨》拍攝外景，劇情講眾人穿上士兵服飾，在山林間演繹一場小型戰爭，而陳慧珊只讓記者拍照，未有受訪。
玩「英法大戰」
Tony對於天氣炎熱，仍要戴帽、揸槍，以士兵look示人，他謂：「覺唔覺我有啲面黑？講笑啫！呢場英法大戰應該係成個劇最辛苦嘅一場，我都好耐冇感受過熱天喇，一場半場冇所謂，啲女同事就慘啲，開完幾晚通宵。（時裝劇都要英法大戰？）其實個劇每集都有啲噱頭帶出訊息，今日嘅戲係帶出信任嘅重要。」
Tony提到有報道指他遭Ali姣埋身，他說：「我唔知寫咗啲咩，但佢一定唔係姣精。（今後避忌啲，等詩詠放心？）嗰啲外景相，我哋都冇做啲乜嘢，其實Ali好好人，我唔覺佢姣，亦冇見佢姣人，好笑容唔代表就係姣，佢冇姣我囉，我同佢亦都一定唔會有緋聞。」
唐詩詠冇詐型
Ali則對傳言一笑置之，她說：「我第一次拍咁多戲份嘅劇，就算捱夜辛苦，都覺得好玩。（唔嬲話你姣洪永城？）終於寫到我啦？點解喺洪永城身邊嘅女仔，一定要同佢傳緋聞，冇法啦，可能我又演過狐狸精同小三角色，我會避忌啲，但佢唔使我姣啦，佢咁受歡迎！（怕唐詩詠詐型？）唔會，我哋喺化妝間撞到，都笑得好開心。人哋點講，控制唔到，但我唔會刻意埋身，身體接觸都盡量避免，正常交往OK。（外界已將你定型？）所以我要做多啲其他角色，好似呢個劇，感情線只係其中一part，仲有其他方面可以發揮。」
文：影視組