青雲稱帝 唔加片酬兼打鑊甘

電影《竊聽風雲3》於今屆香港電影金像獎分別奪得影帝、最佳男配角及最佳編劇三個獎項，大熱稱帝的青雲乃闊別八年後再奪金像影帝，心情興奮的他先於台上發表「太空船論」冧太太郭藹明（Amy），賽後更拍住拖連踩兩場慶功宴，Amy更三度獻吻祝賀，場面溫馨，惟青雲卻腼腆不肯為「太空船論」解畫。

郭藹明綠衣旺夫

青雲將赴杭州為陳木勝新片開工，他說對上一次拍動作片已是廿年前：「套戲係大哥洪金寶做武指，我從來唔係拍打戲，今次仲要打得幾甘，真係要訓練吓，到時要對住彭于晏同吳京，佢哋知我唔揪得都會就我，咁我又唔使練到朱古力身形，但到時會墊pad！」再做影帝，青雲直言應該不會加片酬，因為工作一早定好。Amy以往與他出席頒獎禮總愛穿綠色裙，是否為了旺他奪獎？青雲笑謂：「係咩？呢啲係女仔先留意到。（會唔會再慶功？）未必，近日同謝霆鋒拍緊套戲，過兩日就要開番工。」

劉青雲（左二）、曾江（中）與麥兆輝（左）、莊文強（右三）、施南生（右二）等一同慶祝。	王菀之勇奪雙獎，興奮開香檳慶祝！	王菀之捧着雙獎接受fans的祝福。

趙薇為黃渤打氣

而首度獲最佳男配角的老戲骨曾江，在慶功宴上心情仍然激動：「做咗演員差不多六十年，至今仲有人賞識，好感動、感觸同感恩。（你擊敗同片嘅方中信。）我覺得佢今次造型幾特別，令佢取勝機會都好高，但唔可以話邊個贏或輸，有好多因素嘅，未必係我演戲令我拎。（會繼續拍多啲戲？）我有體力可以應付，工作唔太辛苦，劇組安排我拍八個鐘收得工，寧願拍多日，咁我點解要退休呢？搵個21歲細路仔去扮老人，點解唔搵個老人做番老人呢？」

至於開齋奪金像影后的趙薇，在慶功宴表示對角色犧牲感值得，更鼓勵失落影帝的黃渤：「以他的能力，以後甚麼獎都可以拿到，因為他真的是中國最好的男演員！」其一眾好友舒淇、黃曉明及楊冪昨日紛紛在網上留言恭喜她。

冧爆叫Eric速返

至於憑電影《金雞SSS》連奪最佳新演員及最佳女配角的Ivana，連走兩場慶功，現場有廿名粉絲送上她至愛的「四寶」賀她，令Ivana高興不已：「佢哋送咗雞翼、魚蛋、香蕉同朱古力奶畀我，知我唔多飲酒，就用嚟代香檳！」談到男友Eric So隔空網上祝賀，Ivana一臉甜笑謂：「佢好開心好激動，有冇喺電話錫就唔話你哋知！唔使送嘢喇，佢都好忙喺韓國做展覽，我淨係想佢快啲返。」此外，無綫前晚直播金像獎頒獎禮，平均收視23點（約148萬觀眾）,而最高收視為26點（約168萬觀眾），平均收視比上星期同時段升4點，跟去年直播金像獎收視相比，則跌了兩點。

另外，吳鎮宇在微博表示，其子貼中青雲攞影帝，還說他樣子似奧巴馬。

文：影視組