馬楚嵐愛刺激 怕被騙財騙色

有「嫩口周海媚」之稱的模特兒馬楚嵐(Nina)自認典型水瓶女,愛幻想及喜怒無常!外形嬌滴滴的她自爆最享受欣賞恐怖片時的刺激感,但擇偶則非常審慎,全因身邊女性友人曾遭騙財騙色,令她不敢貿貿然開始戀情。

年輕活潑的o靚模Nina甜笑時有對腰果眼及兔仔牙,貌似女星周海媚,身材亦跟正版一樣有睇頭。熱愛看書及睇電影的她自認愛幻想,屬典型水瓶座性格:「我性格幾矛盾,時嘈時靜,好似精神分裂咁。大家都覺得我脾氣好,但又忽冷忽熱,唔出聲時令人誤會好寸。」

鍾情大隻男

問到最愛看哪類電影?外形斯文嬌滴滴的Nina的答案竟然是血腥恐怖片,認真嚇你一跳。她說:「我品味幾奇怪,唔多睇愛情片,鍾意睇懸疑片,甚至血腥暴力、喪屍!鍾意刺激嘅!啲男仔成日同我睇鬼片,我目不轉睛完全唔驚,佢哋都好驚訝,試過同男仔睇,我安慰番佢轉頭添!」

雖然興趣大膽,但Nina現實中是一名小女人,需要男友保護,最愛陽光大隻男,更視韓國組合Big Bang的太陽為男神:「之前睇佢表演,我感動到不停尖叫。欣賞佢唱歌跳舞,感覺又健康。」但她表示有女性友人曾被騙財騙色,令她也對感情卻步,不敢貿貿然開始戀情:「就算一見鍾情,都要慢慢了解吓。我亦唔會主動追人,所以好難有機會拍拖。」

想有超能力

Nina兒時最愛看童話故事,更會天馬行空,幻想自己是故事人物去冒險:「最記得係《愛麗斯夢遊仙境》,我好想離開呢個世界見唔同嘅人同事,我仲想自己擁有超能力,最想穿越時空,返去以前改變好多嘢。(最想改變啲乜?)最後悔係當年讀書唔夠努力,所以呢年會增值進修。覺得做model除咗樣都要有知識,以前讀過設計,之後想學多一樣外語,希望第時有機會做作家。」

Profile

馬楚嵐(Nina)

年齡:21歲

身高:1米65

三圍:32C、24、33

興趣:閱讀、看電影、美術

文:立影

攝:張福宏

場地:Studio UME