JW遇麻甩佬摸黑跟蹤
歌手JW深宵在寂靜街道上被「麻甩佬」跟蹤，嚇得她膽顫心驚，兩分鐘路程卻有家歸不得，手震震致電友人求救，JW以自身的恐怖經歷叮囑天下女性一定要打醒十二分精神，切記時刻要與家人、朋友保持聯絡，以策安全。
歌手JW昨日凌晨在Instagram自爆被一陌生中年漢跟蹤，令她嚇破膽，上載自拍照的JW一副欲哭無淚的樣子：「我尋晚真係差啲嚇死。」JW昨日接受記者訪問親述被跟蹤的恐怖經歷，她憶述昨日凌晨時分工作後，獨自乘港鐵回家，剛出港鐵站過馬路時，就發覺迎面而來一個男子望住她，她說：「佢明明過緊馬路，中途突然U-turn跟住我，當時條街冇乜人，我肯定佢跟住我，嚇到我即刻打電話畀朋友求救。」
回家路僻唔敢行
JW表示她本可用兩分鐘跑回家，為怕住址外洩，朋友千叮萬囑她不要回家，她說：「加上我返屋企條路比較偏僻，要經過巷仔，所以我都唔敢行，我已經刻意停低，佢喺另一邊又停低，可能知我發現佢跟住我，佢就特登行去馬路口，但到綠燈佢又唔過馬路，咁啱有架的士剛落客，我即刻跳上車！」她形容用22元換取安全感回家實在太值得了。
稍後公布新動向
JW呼籲女生夜歸一定要小心，要留意周圍有冇可疑人物，她說：「平日我夜返通常搭的士，會同屋企人報備的士車牌，又會同朋友傾住電話以策安全。」JW表示以前夜返也遇過類似情況，但對方很快就離去，她說：「未試過今次咁驚，對峙嗰幾分鐘我緊張到不得了，返到屋企都驚魂未定。」跟黎明的Amusic已經約滿的JW，坦承已回復自由身，稍後她會公布新動向。
文：音樂組